Shangxey hemkarliq teshkilatining yighinida asasliqi térrorizmgha qarshi turush mesililiri muhakime qilinidu

Shangxey hemkarliq teshkilatining 12-nöwetlik yighini 1-iyun küni béyjingda bashlinish aldida turmaqta.
Muxbirimiz irade
2012-05-31
Élxet
Pikir
Share
Print

Xitay mu'awin tashqi ishlar ministiri chén goping yighin heqqide bergen bayanatida shangxey hemkarliq teshkilatining rayondiki térrorizm heriketliri bilen téximu qattiq küresh qilidighanliqini bildürgen.

Xitay kündilik gézitining xewer qilishiche, chén goping sözide, "Shangxey hemkarliq teshkilatigha eza döletler dölet ichidiki jiddiy weqelerni bir terep qilishta öz-ara hemkarlishishni ishqa ashuridu" dégen.

Shangxey hemkarliq teshkilatining qurulushi we eza döletlerning közligen meqsetlirining her xilliqi heqqide oxshimighan köz qarashlar mewjut bolsimu, lékin közetküchilerning köpi xitayning meqsitining Uyghurlarning musteqilliq heriketlirini basturush ikenlikini ilgiri süridu. Uning üstige xitay xelq azadliq armiyisi bash shtabi bashliqi chén bingdéning yighin bashlinishtin burun özbékistanda ziyarette bolup, xitayning zémin pütünlükini qoghdashta hemkarlishishni telep qilishimu bu köz qarashni quwwetlimekte.

Shinxu'a agéntliqining xewiride körsitilishiche, özbékistan mudapi'e ministiri qobul berdiyéw xitay généralini kütüwalghanda "Özbékistan bir xitay siyasitide ching turup, xitayning teywen, shinjang we tibet mesililiridiki meydanini qollaydu" dep körsetken.

Xewerlerdin qarighanda, shangxey hemkarliq teshkilatning 12-nöwetlik yighinigha xitay dölet re'isi xu jintawning teklipige bina'en qazaqistan, qirghizistan, özbékistan, tajikistan we pakistan dölet bashliqliridin bashqa yene afghanistan prézidénti xamid karzay we iran prézidénti ehmedi nijat qatnishidiken.

Toluq bet