Әркин асия радиоси мухбири шөһрәт һошур 2012-йиллиқ ню-йорк фестивалида йәнә бир алтун медал алди

Радиомиз уйғур бөлүми мухбири шөһрәт һошурниң 2011-йили 28-декабир «хотән мокуйла вәқәси» һәққидики «ана вә балиларниң әркинлик садаси» намлиқ инглизчә хәвири 2012-йиллиқ ню-йорк фестивалида алтун медалға еришти.
Мухбиримиз меһрибан
2012-06-19
Елхәт
Пикир
Share
Принт

2011-Йили 28-декабир хитай сақчилири чеградин чиқип кетишкә урунғанлиқи илгири сүрүлгән бир қисим уйғурларни оққа тутуп, арисида икки аялни өз ичигә алған 7 уйғурни етип өлтүргән вә балиларни яриландурған иди.

Хитай даирилири вәқәни аталмиш террорчиларға артишқа урунған болсиму, вәқәниң һәқиқий маһийити радиомиз тәрипидин хәлқара җамаәтчиликкә ашкариланғандин кейин, җим болған иди.

Ню-йорк фестивали ахбарат саһәсидә һәр йили бир қетим өткүзүлидиған хәлқаралиқ мусабиқә. Бу йиллиқ ню-йорк фестивалиға 30 дин артуқ дөләттики 200 дин артуқ ахбарат агентлиқиниң әсәрлири қатнаштурулған. Шөһрәт һошур әпәндиниң «ана вә балиларниң әркинлик садаси» намлиқ программиси, бултур әрәб дунясида йүз бәргән мисир тәһрир мәйдани инқилаби, ливийә вәқәси қатарлиқлар билән бирликтә фестивалға қатнаштурулған әң яхши әсәр, дәп баһаланған.

18-Июн ню-йоркта өткүзүлгән мукапат тарқитиш мурасимиға мухбиримиз шөһрәт һошурму қатнашти. Униң билдүрүшичә, йиғин башқурғучиси «ана вә балиларниң әркинлик садаси» намлиқ әсәрниң алтун мукапатқа еришиш сәвәби һәққидә тохтилип: бу хәвәрдә әйни чағда хитай мәтбуатлирида «хотән мокуйла йезисида сақчилар террорчилардин 4 ни өлтүрүп, 4 нәпирини яриландуруп, 4 нәпирини қолға алди» дәп елан қилинған ялған хәвәрниң һәқиқий маһийити ашкарилинип, хитай сақчилири тәрипидин етип өлтүрүлгән аталмиш «террорчилар» ниң әмәлийәттә 2 нәпириниң аял икәнлики, яриланған балиларниң ичидә бириниң техи әмдила йәттә яшқа киргән бала икәнликидәк һәқиқәт ашкариливетилгәнлики программиниң қиммитини намаян қилди, дегән.

Бу қетимқи мусабиқидә йәнә радиомиз корийә бөлүмидин җуң минноһ, вон хеле, җинсео ле қатарлиқ мухбирларниң әсәрлириму талланған әсәрләр мукапатқа еришти.

Мухбиримиз шөһрәт һошур 2009-йилдики ню-йорк фестивалида әркин асия радиоси уйғур бөлүми үчүн тунҗи алтун медални алған иди.

Пикирләр (0)
Share
Толуқ бәт