Рабийә қадир ханим австралийини панаһланғучилар мәсилисидә малайшияға ишинип кәтмәсликкә үндиди

Австралийидә паалийәттә болуватқан уйғур миллий һәрикитиниң йол башчиси рабийә қадир ханим, бүгүн йәни 7-өктәбир күни йәрлик ахбарат васитилиригә қилған сөзидә австралийә һөкүмитини сиясий панаһланғучилар мәсилисидә, малайшияға бәк ишинип кәтмәсликкә, йәни бу саһәдә малайшия билән һәмкарлашқанда еһтиятчан болушқа чақирди.
Мухбиримиз шөһрәт һошур
2011-10-07
Елхәт
Пикир
Share
Принт

Австралийә һөкүмити австралийигә келиватқан сиясий панаһланғучиларниң санини чәкләш үчүн, сиясий панаһлиқ мәқситидә австралийигә кәлгән вә келиш сәпиридә тутулған бир түркүм кишиләрни малайшияға йөткәш вә у җайда сиясий панаһлиқ илтимаси б д т тәрипидин тәстиқланғандин кейин австралийигә көчүрүп әкелиш түзүмини йолға қойған.

Малайшияға 300 милйон доллар иқтисади кирим елип келидиған бу түзүм бу йил 5-айда икки дөләт арисидики түзүлгән келишим бойичә иҗра қилинмақта иди. Австралийидики абч радиосиниң хәвәр қилишичә, рабийә ханим австралийини агаһландурғанда, малайшия һөкүмитиниң йеқинда 11 нәпәр уйғур панаһланғучини хитайға қайтуруп беривәткәнликини пакит қилип көрсәтти.

Рабийә ханим хитайға қайтурулғанларниң үн-тинсиз ғайиб болуп келиватқанлиқини вә нөвәттә хәлқара аммиви тәшкилатларниң уларниң тәқдиридин җиддий әндишә қиливатқанлиқини тилға елип, малайшияниң мана мушундақ җиддий бир мәсилидә хитай һөкүмитигә боюн егип, хәлқара әһдинамиләрни дәпсәндә қилғанлиқини билдүрди.

Рабийә ханим бу сөзлири арқилиқ, уйғур сиясий панаһланғучилар мәсилисиниң җиддийликини австралийә һөкүмити вә хәлқиниң қайтидин сәмигә салди.

Пикирләр (0)
Share
Толуқ бәт