Rabiye qadir xanim awstraliyini panahlan'ghuchilar mesiliside malayshiyagha ishinip ketmeslikke ündidi

Awstraliyide pa'aliyette boluwatqan Uyghur milliy herikitining yol bashchisi rabiye qadir xanim, bügün yeni 7-öktebir küni yerlik axbarat wasitilirige qilghan sözide awstraliye hökümitini siyasiy panahlan'ghuchilar mesiliside, malayshiyagha bek ishinip ketmeslikke, yeni bu sahede malayshiya bilen hemkarlashqanda éhtiyatchan bolushqa chaqirdi.
Muxbirimiz shöhret hoshur
2011-10-07
Élxet
Pikir
Share
Print

Awstraliye hökümiti awstraliyige kéliwatqan siyasiy panahlan'ghuchilarning sanini cheklesh üchün, siyasiy panahliq meqsitide awstraliyige kelgen we kélish sepiride tutulghan bir türküm kishilerni malayshiyagha yötkesh we u jayda siyasiy panahliq iltimasi b d t teripidin testiqlan'ghandin kéyin awstraliyige köchürüp ekélish tüzümini yolgha qoyghan.

Malayshiyagha 300 milyon dollar iqtisadi kirim élip kélidighan bu tüzüm bu yil 5-ayda ikki dölet arisidiki tüzülgen kélishim boyiche ijra qilinmaqta idi. Awstraliyidiki abch radi'osining xewer qilishiche, rabiye xanim awstraliyini agahlandurghanda, malayshiya hökümitining yéqinda 11 neper Uyghur panahlan'ghuchini xitaygha qayturup bériwetkenlikini pakit qilip körsetti.

Rabiye xanim xitaygha qayturulghanlarning ün-tinsiz ghayib bolup kéliwatqanliqini we nöwette xelq'ara ammiwi teshkilatlarning ularning teqdiridin jiddiy endishe qiliwatqanliqini tilgha élip, malayshiyaning mana mushundaq jiddiy bir mesilide xitay hökümitige boyun égip, xelq'ara ehdinamilerni depsende qilghanliqini bildürdi.

Rabiye xanim bu sözliri arqiliq, Uyghur siyasiy panahlan'ghuchilar mesilisining jiddiylikini awstraliye hökümiti we xelqining qaytidin semige saldi.

Toluq bet