Xitay sichüen genzidiki bir tibet ibadetxanisining lamasini uzun muddetlik qamaq jazasigha höküm qildi

Xitay hökümiti charshenbe küni sichüenning tibetler olturaqlashqan genzi rayonidiki tibet ibadetxanisining jama'et ichide hörmetke sazawer lamaliridin furbu sérin rénpochini az kem 9 yilliq qamaq jazasigha höküm qildi.
Muxbirimiz erkin
2009-12-31
Élxet
Pikir
Share
Print

Birleshme axbarat agéntliqining xewer qilishiche, xitay da'iriliri rénpochini ornidin paydilinip, "qanunsiz yer igiliwélish", "qanunsiz oq - dora saqlash" jinayiti bilen eyibligen.

Közetküchiler, rénpochi 2008 ‏- yili 3 ‏- ayda yüz bergen lxasa weqesige chétilip jazalan'ghan tunji yuqiri derijilik tibet lamasi ikenlikini bildürmekte.

Rénpochining adwokati jyang tyenyung, uninggha artilghan jinayetlerning put tirep turalmaydighanliqini, sot mehkimisi rénpochining a'ilisige qanunsiz teleplerni qoyup turuwalghanliqtin uni 2 ‏- qétimliq sotta aqliyalmighanliqini bildürgen.

Furbu sérin rénpochi 2008 ‏- yili 5 ‏- ayda 100ge yéqin tibet rahibi genzide namayish qilip, xitay da'irilirining dalay lamani tenqid qilishni mezmun qilghan "wetenperwerlik telim - terbiye" herikitige qarshi chiqqandin kéyin qolgha élin'ghan idi.

Adwokat jyang tyenyung metbu'atlargha bergen mezkur dilo heqqidiki bayanatida sotning qararini tenqidlep, "sot mehkimisining bu diloda qanunni asas qilip höküm chiqarmighanliqi, belki yuqirining yolyoruqigha asasen höküm chiqarghanliqi"ni ilgiri sürgen.

Toluq bet