Үрүмчидә намайишқа илтимас сунған 7 уйғур тутқун қилинған

Бүгүн бүйүк ира қатарлиқ хитайчә тор бәтләрниң хәвәр қилишичә, үрүмчидә җүмә күни намайишқа илтимас сунған 7 уйғур тутқун қилинған. Хәвәрдә билдүрүлүшичә, мушу айниң 22 ‏- вә 23 ‏- күнлири үрүмчидә йәнә 22 уйғур үстидин һөкүм елан қилинип, 5 игә өлүм җазаси вә 5 игә кечиктүрмә өлүм җазаси берилгәндин кейин, вәзийәтниң тәрәққияти кишиләрни әндишигә салған.
Мухбиримиз шоһрәт һошур
2009-12-29
Елхәт
Пикир
Share
Принт

Болупму, пәрзәнтлири тутуп турулуватқан вә ғайип болуп кәткән аилиләр, пәрзәнтлириниң тәқдиридин җиддий шәкилдә әндишигә чүшкән. Нәтиҗидә бир түркүм кишиләр йәниму көп өлүм җазалириниң алдини елиш үчүн, өткән сот һөкүмлиригә қарита наразилиқ намайиши өткүзүшни планлиған вә җоңхуа хәлқ җумһурийити асасий қануниниң алақидар бәлгилимилиригә асасән, намайиш үчүн һөкүмәткә илтимас сунған.

25 ‏- Декабир күни улар имза топлап һөкүмәткә илтимас сунған чеғида, улардин 7 киши сақчилар тәрипидин тутқун қилинған. Мәлум болушичә, нөвәттә бу 7 кишиниң 4 нәпири үрүмчидики тяншан районлуқ тутуп туруш орнида тутуп турулмақта; қалған 3 нәпири болса из-дерәксиз. Тутқун қилинғанлардин бири патигүл исимлик 64 яшлиқ аял; йәнә бири маһмут сабир исимлик 59 яшлиқ кучарлиқ киши.

Бу қетимқи намайиш илтимаси, 5 ‏- июл тутқунлири һәққидә ечилған әң йеқинқи соттин 2 күн кейин сунулған. Бу сот һөкүмлири бәзиләрдә вәһимә пәйда қилса, йәнә бәзиләрдә башқа кәлгәнни көрүш тәвәккүлчиликини шәкилләндүрүп қойғанлиқини көрсәтмәктә.

Хәвәрдики йип учлиридин қариғанда, пиланланған намайишниң асаслиқ чоңлар йәни тутқунларниң аилә башлиқлири тәрипидин елип берилмақчи болғанлиқи мәлум болмақта.

Толуқ бәт