دائىرىلەر دەۋاگەر گۈلجەننەتكە بەرگەن 6 مىڭ يۈەن پۇلنى قايتۇرۇپ ئالالماي 10 كۈنلۈك قاماققا بۇيرۇغان

پولات زاۋۇتىنىڭ سابىق ئىشچىلىرىدىن ئەرزدار گۆلجەننەت، مۇشۇ ئاينىڭ بېشىدا بېيجىڭدا ئەرز ئىشلىرى بىلەن مەشغۇل ئىدى. شۇ كۈنلەردە ئۇنى قايتۇرۇپ ئەكىتىش ئۈچۈن ئۈرۈمچىدىن كەلگەن دائىرىلەر گۆلجەننەت بىلەن كۆرۈشۈپ ئۇنى قايتىپ كېتىشكە يەنە بىر قېتىم ئۈندىگەن.
مۇخبىرىمىز شۆھرەت ھوشۇر
2012-01-30
ئېلخەت
پىكىر
Share
پرىنت

گۈلجەننەت، ئەگەر بىر ئايدىن بېرى تارتقان چىقىملىرى تۆلەپ بېرىلسە قايتىپ كېتىشكە ماقۇل بولغان ۋە تارتقان چىقىمى ئۈچۈن 10 مىڭ يۈەن تەلەپ قىلغان. ئىككى تەرەپ سودىلىشىش ئارقىلىق دائىرىلەر ئۇنىڭغا 7 مىڭ يۈەن بېرىشكە ماقۇل بولغان ۋە قولىغا 6 مىڭ يۈەن نەق پۇل تۇتقۇزغان.

دائىرىلەر گۆلجەننەتنى ئېلىپ ئۈرۈمچىگە كەلگەندىن كېيىن، تۈزۈلگەن ئاغزاكى كېلىشىمدىن يېنىپ، بېيجىڭدىكى چېغىدا بەرگەن 6 مىڭ يۈەننى قايتۇرۇپ بېرىشنى تەلەپ قىلغان. گۆلجەننەت قايتۇرۇشنى رەت قىلغان. نەتىجىدە دائىرىلەر ئۇنى ساقچىلارغا تاپشۇرۇپ بەرگەن. ساقچىخانا ئۇنىڭغا 10 كۈنلۈك تۇتۇپ تۇرۇش جازاسى بەرگەن.

ئۆتكەن ھەپتە گۆلجەننەتنىڭ يولدىشى خالمۇرات رادىئومىز زىيارىتىنى قوبۇل قىلىپ، گۇلجەننەتنىڭ تۇتۇپ تۇرۇش مۇددىتىنىڭ 2 كۈندىن كېيىن توشىدىغانلىقىنى ۋە قاماقتىن چىقىپلا يەنە بېيجىڭغا قاراپ يول ئالىدىغانلىقىنى بىلدۈردى.

پىكىرلەر (0)
Share
تولۇق بەت