Uyghur teshkilatliri yawrupaning gu'antanamo tutqunliri heqqidiki meydanini alqishlidi

Dunya Uyghur qurultiyi we amérika Uyghur birleshmisi qatarliq Uyghur teshkilatliri yawrupa döletlirining gu'antanamoda tutup turuluwatqan we öz yurtlirigha qayturulishi mumkin bolmighan mehbuslarning bir qismini qobul qilishni oylishiwatqanliqi toghrisidiki bayanatlirini qizghinliq bilen qarshi alidighanliqini bildürdi.
Muxbirimiz ömer qatat
2008-12-24
Élxet
Pikir
Share
Print

Bu heqte seyshenbe küni amérika Uyghur birleshmisi teripidin élan qilin'ghan bayanatta, amérika Uyghur birleshmisi gu'antanamo herbiy türmisini taqash toghrisidiki qarari üchün, amérika prézidént wezipisige saylan'ghan barak obamagha minnetdarliq bildüridu shuningdek gu'antanamoda tutup turuluwatqan mehbuslarning bir qisimini qobul qilishni oylishiwatqan yawrupa döletlirige bolupmu gérmaniye we portugaliye hökümetlirige rehmet éytidu, déyilgen.

Xitay türmiliride Uyghur siyasiy mehbuslarning dawamliq ten jazasi we türlük qéyin - qistaqlargha uchrawatqanliqi eskertilgen bayanatta, xitay hökümitining gu'antanamoda tutup turuluwatqan Uyghur mehbuslar xitaygha qayturulsa, ulargha adaletlik mu'amile qilinidighanliqi heqqidiki wedilirige héchqachan ishen'gili bolmaydighanliqi tekitlen'gen.

Amérika Uyghur birleshmisi bayanatida shuningdek 20‏ - yanwar küni prézidént wezipisini resmiy tapshurup alidighan barak obama hökümitidin gu'antanamoda tutup turuluwatqan 17 neper Uyghur mehbusni amérikigha yaki yawrupa döletlirining birige orunlashturushni özining eng aldinqi wezipilirining biri qilip békitishini telep qilghan.

Toluq bet