Милләтләр университетиниң профессори 5 - июлдин кейин 'хәнзу - уйғур мунасивитиниң яхшиланғанлиқи'ни көрсәтти

Хитай тилида тарқитиливатқан "уйғур биз" тори вә "бошун" торлирида елан қилинишичә, бейҗиңдики мәркизий милләтләр университетиниң профессори яң шеңмиң йеқинда уйғур елидики хитай - уйғур мунасивәтлири һәққидә тәкшүрүш елип барған.
Мухбиримиз үмидвар
2010-05-30
Елхәт
Пикир
Share
Принт

Профессор яң шеңмиң, 5 - июл вәқәсиниң бу икки милләтниң мунасивитигә қандақ тәсир көрсәткәнлики тоғрисида материял топлаш арқилиқ, "хәнзу - уйғур мунасивәтлири 5 - июл вәқәсиниң тәсиригә тамамән учримиған. Әксичә, икки милләтниң мунасивити барғансери яхшиланған", "5 - июл вәқәсидин кейин, уйғурлар ичидә хәнзу тили билидиғанларниң нисбити ашқан, хәнзулар ичидә уйғур тилини билидиғанлар барғансери көпәйгән", "уйғурларниң дөләт кимлик туйғуси ашқан" дегәндәк бир қатар йәкүнләрни чиқарған.

Бирақ, профессор яң шеңмиңниң тәкшүрүш доклати һәққидики учурда мәзкур профессорниң қандақ тәкшүрүш елип барғанлиқи, бу нәтиҗиләргә еришиштә қандақ усул қолланғанлиқи ейтилмиған. Әмма, профессор яңға аит инкасларда униң уйғур аптоном райониниң сабиқ компартийә секритари ваң лечүән билән сөһбәтләшкәнлики, ваң лечүәнниң милләтләр университетиниң оқутқучиси илһам тохтини әйиблигәнлики һәмдә профессор яңниңму илһам тохтиға нисбәтән ваң лечүән билән охшаш пикирдә икәнлики көрситилгән.

"Уйғур биз" торидики инкасларда йезилишичә, өзини уйғуршунас дәп атиған, әмма уйғур тилини билмәйдиған мәзкур профессор 5 - июл вәқәсидин илгириму тәкшүрүш елип берип, уйғурларниң җуңго дөләт кимлик туйғусиниң күчлүк икәнликини оттуриға қойған икән.

Уйғур биз торидики бу хәвәрдин кейин профессор яңниң доклатиниң әсли нусхиси вә тәпсилатини тепиш вә яки униң пикрини биваситә игиләшкә мувәппәқ болалмидуқ.

Пикирләр (0)
Share
Толуқ бәт