Milletler uniwérsitétining proféssori 5 - iyuldin kéyin 'xenzu - Uyghur munasiwitining yaxshilan'ghanliqi'ni körsetti

Xitay tilida tarqitiliwatqan "Uyghur biz" tori we "boshun" torlirida élan qilinishiche, béyjingdiki merkiziy milletler uniwérsitétining proféssori yang shéngming yéqinda Uyghur élidiki xitay - Uyghur munasiwetliri heqqide tekshürüsh élip barghan.
Muxbirimiz ümidwar
2010-05-30
Élxet
Pikir
Share
Print

Proféssor yang shéngming, 5 - iyul weqesining bu ikki milletning munasiwitige qandaq tesir körsetkenliki toghrisida matériyal toplash arqiliq, "xenzu - Uyghur munasiwetliri 5 - iyul weqesining tesirige tamamen uchrimighan. Eksiche, ikki milletning munasiwiti barghanséri yaxshilan'ghan", "5 - iyul weqesidin kéyin, Uyghurlar ichide xenzu tili bilidighanlarning nisbiti ashqan, xenzular ichide Uyghur tilini bilidighanlar barghanséri köpeygen", "Uyghurlarning dölet kimlik tuyghusi ashqan" dégendek bir qatar yekünlerni chiqarghan.

Biraq, proféssor yang shéngmingning tekshürüsh doklati heqqidiki uchurda mezkur proféssorning qandaq tekshürüsh élip barghanliqi, bu netijilerge érishishte qandaq usul qollan'ghanliqi éytilmighan. Emma, proféssor yanggha a'it inkaslarda uning Uyghur aptonom rayonining sabiq kompartiye sékritari wang léchüen bilen söhbetleshkenliki, wang léchüenning milletler uniwérsitétining oqutquchisi ilham toxtini eyibligenliki hemde proféssor yangningmu ilham toxtigha nisbeten wang léchüen bilen oxshash pikirde ikenliki körsitilgen.

"Uyghur biz" toridiki inkaslarda yézilishiche, özini Uyghurshunas dep atighan, emma Uyghur tilini bilmeydighan mezkur proféssor 5 - iyul weqesidin ilgirimu tekshürüsh élip bérip, Uyghurlarning junggo dölet kimlik tuyghusining küchlük ikenlikini otturigha qoyghan iken.

Uyghur biz toridiki bu xewerdin kéyin proféssor yangning doklatining esli nusxisi we tepsilatini tépish we yaki uning pikrini biwasite igileshke muweppeq bolalmiduq.

Toluq bet