Викиликсниң қурғучиси ассенге: хитай бизниң һәқиқий дүшминимиз

Америка дөләт ишлар министирлиқиниң дипломатик мәхпий һөҗҗәтлирини дуняға ашкарилаш билән нам чиқарған викиликс төр бетиниң қурғучиси җулиан ассенге чаршәнбә күни әнглийә мәтбуатлириға сөһбәт елан қилип, хитайниң ахбарат әркинлик чәклимиси әң қаттиқ дөләт икәнлики, бирақ викиликс хитайниң түрлүк ахбарат чәклимилиридин атлап өтәләйдиғанлиқини билдүргән.
Мухбиримиз әркин
2011-01-12
Елхәт
Пикир
Share
Принт

Ассенге чаршәнбә күни әнглийә "дөләт әрбаби" журнилида елан қилған баянатта йәнә, америка викиликсниң дүшмини әмәс, бәлки хитай униң асаслиқ технилогийилик дүшмини икәнликини әскәртип, "хитайниң наһайити өткүр вә риқабәтчи техникиларни қоллинип, мәмликәт сиртидики учур мәнбәлири билән мәмликәт ичидики һәр бир тордаш арисида тосуқ қурғанлиқи" ни, лекин өзлириниң хитай тордашлирини викиликс елан қилған барлиқ учурлардин хәвәрдар қилиш үчүн күрәш қилидиғанлиқини тәкитлигән.

Викиликс һазирға қәдәр дунясиниң һәр қайси җайлиридики хитай әлчиханилириниң бейҗиңға йоллиған дипломатик һөҗҗәтлирини ашкарилап бақмиған болсиму, лекин у ашкарилиған бәзи америка дипломатик һөҗҗәтлиридә хитайға мунасивәтлик мәсилиләр тилға елинған иди.

Викиликс ашкарилиған һөҗҗәтләр ичидә бешкәктики америка баш әлчисиниң хитай баш әлчиси билән елип барған манас айродроми вә гуәнтанамодики уйғурларға даир сөһбити, бейҗиңдики америка әлчиханисиниң вашингтонға йоллиған "5‏-июл вәқәси" ниң хитай- мусулманлар мунасивитигә көрситидиған тәсиригә алақидар бәзи һөҗҗәтләр бар иди.

Ассенге әсли австралийилик болуп, 2006‏-йили 12‏-айда викиликс торини қурған. У өткән йили америка дипломатик мәхпий һөҗҗәтлирини ашкарилап, дунядики мәшһур шәхсләрдин болуп қалған. Лекин америка һөкүмити ассенгениниң һәрикитини қанунсизлиқ дәп елан қилип, уни җавабкарлиққа тартидиғанлиқини билдүргән.

Пикирләр (0)
Share
Толуқ бәт