Wikiliksning qurghuchisi assén'gé: xitay bizning heqiqiy düshminimiz

Amérika dölet ishlar ministirliqining diplomatik mexpiy höjjetlirini dunyagha ashkarilash bilen nam chiqarghan wikiliks tör bétining qurghuchisi juli'an assén'gé charshenbe küni en'gliye metbu'atlirigha söhbet élan qilip, xitayning axbarat erkinlik cheklimisi eng qattiq dölet ikenliki, biraq wikiliks xitayning türlük axbarat cheklimiliridin atlap öteleydighanliqini bildürgen.
Muxbirimiz erkin
2011-01-12
Élxet
Pikir
Share
Print

Assén'gé charshenbe küni en'gliye "dölet erbabi" zhurnilida élan qilghan bayanatta yene, amérika wikiliksning düshmini emes, belki xitay uning asasliq téxnilogiyilik düshmini ikenlikini eskertip, "xitayning nahayiti ötkür we riqabetchi téxnikilarni qollinip, memliket sirtidiki uchur menbeliri bilen memliket ichidiki her bir tordash arisida tosuq qurghanliqi" ni, lékin özlirining xitay tordashlirini wikiliks élan qilghan barliq uchurlardin xewerdar qilish üchün küresh qilidighanliqini tekitligen.

Wikiliks hazirgha qeder dunyasining her qaysi jayliridiki xitay elchixanilirining béyjinggha yollighan diplomatik höjjetlirini ashkarilap baqmighan bolsimu, lékin u ashkarilighan bezi amérika diplomatik höjjetliride xitaygha munasiwetlik mesililer tilgha élin'ghan idi.

Wikiliks ashkarilighan höjjetler ichide béshkektiki amérika bash elchisining xitay bash elchisi bilen élip barghan manas ayrodromi we gu'entanamodiki Uyghurlargha da'ir söhbiti, béyjingdiki amérika elchixanisining washin'gton'gha yollighan "5‏-iyul weqesi" ning xitay- musulmanlar munasiwitige körsitidighan tesirige alaqidar bezi höjjetler bar idi.

Assén'gé esli awstraliyilik bolup, 2006‏-yili 12‏-ayda wikiliks torini qurghan. U ötken yili amérika diplomatik mexpiy höjjetlirini ashkarilap, dunyadiki meshhur shexslerdin bolup qalghan. Lékin amérika hökümiti assén'génining herikitini qanunsizliq dep élan qilip, uni jawabkarliqqa tartidighanliqini bildürgen.

Toluq bet