Хитай б д т йиғинида 19 дөләтниң тәклип вә пикирини қобул қилишни рәт қилди

Хитай чаршәнбә күни б д т кишилик һоқуқ кеңишиниң хитай кишилик һоқуқ хатирисини қәрәллик тәкшүрүш йиғинида хитайға язма тәклип, пикир бәргән дөләтләргә җаваб қайтуруп, тәклип пикир бәргән 60 дөләт ичидики 19 дөләтниң тәклип, пикирини қобул қилишни пүтүнләй яки қисмән рәт қилған.
Мухбиримиз әркин
2009-02-11
Елхәт
Пикир
Share
Принт

Тәклип пикири пүтүнләй яки қисмән рәт қилинған дөләтләр ичидики әнглийә, шветсийә, данийә, норвегийә қатарлиқлар тәклип пикридә уйғур мәсилисини оттуриға қойған иди.

Хитай, тәклип пикирини пүтүнләй рәт қилған дөләтләр шветсарийә, әнглийә, франсийә чехийә, мексика, италийә, венгрийә қатарлиқларни өз ичигә алидикән. Бу дөләтләр тәклип пикридә хитайни б д т ниң "пуқралар һоқуқи вә сияси һоқуқ хәлқара әһдинамиси" ни тезрәк әмәлийләштүрүшкә чақирип, өлүм җазасини бикар қилиш, париж низамнамисиға уйғун келидиған кишилик һоқуқ оргини қуруш, чәтәллик мухбирларниң ахбарат әркинликигә даир йеңи бәлгилимини хитайниң мәмликәт ичидики ахбарат вастилириға тәдбиқлаш, һоқуқни қоғдаш паалийәтчилириниң намайиш қилип, өз пикирини ипадилишигә рухсәт қилишни тәләп қилған.

 Тәклип пикири пүтүнләй рәт қилинған дөләтләрниң бири чех җумһурийити болса, кишилик һоқуқ кеңишиниң дүшәнбә күнки йиғинида хитайниң уйғурларға мунасивәтлик қанун вә иш беҗириш усулини қайта көздин кәчүрүш, уйғурларға қаритилған диний паалийәт чәклимиси, паалийәт әркинлик чәклимиси вә йиғилиш әркинлик чәклимисини бикар қилиш қатарлиқларни оттуриға қойған иди.

Пикирләр (0)
Share
Толуқ бәт