Xitay b d t yighinida 19 döletning teklip we pikirini qobul qilishni ret qildi

Xitay charshenbe küni b d t kishilik hoquq kéngishining xitay kishilik hoquq xatirisini qerellik tekshürüsh yighinida xitaygha yazma teklip, pikir bergen döletlerge jawab qayturup, teklip pikir bergen 60 dölet ichidiki 19 döletning teklip, pikirini qobul qilishni pütünley yaki qismen ret qilghan.
Muxbirimiz erkin
2009-02-11
Élxet
Pikir
Share
Print

Teklip pikiri pütünley yaki qismen ret qilin'ghan döletler ichidiki en'gliye, shwétsiye, daniye, norwégiye qatarliqlar teklip pikride Uyghur mesilisini otturigha qoyghan idi.

Xitay, teklip pikirini pütünley ret qilghan döletler shwétsariye, en'gliye, fransiye chéxiye, méksika, italiye, wén'griye qatarliqlarni öz ichige alidiken. Bu döletler teklip pikride xitayni b d t ning "puqralar hoquqi we siyasi hoquq xelq'ara ehdinamisi" ni tézrek emeliyleshtürüshke chaqirip, ölüm jazasini bikar qilish, parizh nizamnamisigha uyghun kélidighan kishilik hoquq orgini qurush, chet'ellik muxbirlarning axbarat erkinlikige da'ir yéngi belgilimini xitayning memliket ichidiki axbarat wastilirigha tedbiqlash, hoquqni qoghdash pa'aliyetchilirining namayish qilip, öz pikirini ipadilishige ruxset qilishni telep qilghan.

 Teklip pikiri pütünley ret qilin'ghan döletlerning biri chéx jumhuriyiti bolsa, kishilik hoquq kéngishining düshenbe künki yighinida xitayning Uyghurlargha munasiwetlik qanun we ish béjirish usulini qayta közdin kechürüsh, Uyghurlargha qaritilghan diniy pa'aliyet cheklimisi, pa'aliyet erkinlik cheklimisi we yighilish erkinlik cheklimisini bikar qilish qatarliqlarni otturigha qoyghan idi.

Toluq bet