Хитай, йеңи йилдин башлап интернет арқилиқ әрз қобул қилмақчи

Шинхуа агентлиқиниң хәвиридә көрситишичә, хитай дөләтлик әрзийәт идариси 2009 ‏ - йили 1 - январдин башлап әрзийәтчиләрниң илхәт арқилиқ йоллиған әрзини қобул қилишқа башлайдиғанлиқини елан қилған.
Мухбиримиз гүлчеһрә
2008-12-30
Елхәт
Пикир
Share
Принт

Хитай дөләтлик әрзийәт идарисиниң тор бәт мулазимәт ишханисидикиләрниң билдүрүшичә, мәзкур орун һазирчә пәқәт деһқанчилиққа даир әрзләрнила қобул қилишқа мәхсус адәм бекиткән болуп, хитайниң һәр қайси җайлиридин әрзийәтчиләр өзлири кәлмәй турупму, әрзийәт идарисиниң интернет тор бетидә илхәт арқилиқ әрзини йоллиса болидикән.

Беританийә ахбаратиниң көрситишичә, бу йил 7 - айда хитай бихәтәрлик министири, әрзийәтчиләрни башқуруш һәққидә ечилған йиғинда имкан қәдәр әрзийәтчи амминиң бейҗиңға келишиниң алдини елип бейҗиң олимпикини әрзийәтчиләрниң қлаймиқанчилиқидин хали қилиш керәкликини оттуриға қойған.

Хитай һөкүмити үстидин бейҗиңға әрз қилип барғучи амма давамлиқ түрдә хитай сақчилириниң қопаллиқ билән тосқунлуқ қилиши, зораванлиқи һәм тутқун қилишиға учрап кәлмәктә.

Көзәтчиләр, гәрчә хитай даирилириниң интернет арқилиқ әрз қобул қилишни йолға қоюши әрзийәтчи пуқраларни бейҗиңға берип увалчилиққа учраштин нисбәтән сақлап қалсиму, буниң билән хәлқниң барлиқ әрзиниң алақидар даириләр тәрипидин етибарға елинишидин вә мувапиқ һәл қилинишидин анчә үмид күткили болмайду дәп қаримақта.

Нөвәттә хитайда интернет абонтлири 250 милйондин ашидиған болуп, хитай һөкүмити интернет ториниң һәм амминиң интернет арқилиқ йүргүзүватқан муназирилиригә диққәт билән қаримақта һәм амалниң баричә амминиң тор арқилиқ әркин пикир баян қилишини қамал қилип кәлмәктә.

Пикирләр (0)
Share
Толуқ бәт