Хитай ичкиригә келип ишлигүчи вә тиҗарәт қилғучилар мәсилиси' бойичә хизмәт йиғини ачти

Хитай мәркизий һөкүмити 20 - июн күни сичүән өлкисиниң чеңду шәһиридә мәхсус "шинҗаңдики һәр милләт аммисиниң ичкиригә келип ишләш вә сода қилиш мәсилиси" бойичә хизмәт йиғини ачқан болуп, шинхуа агентлиқиниң хәвәр қилишичә, мәзкур хизмәт йиғинида хитай мәркизий сиясий қанун комитетиниң муавин секретари, сиясий бюро әзаси ваң лечүән сөз қилған.
Мухбиримиз үмидвар
2010-06-20
Елхәт
Пикир
Share
Принт

Гәрчә, мәзкур хәвәрдә бу йиғинға йәнә қайси рәһбирий шәхсләрниң қатнашқанлиқи ейтилмисиму, бирақ ваң лечүәнниң сөзи бирқәдәр тәпсилий тонуштурулған.

Ваң лечүән сөзидә, "һәр қайси җайлардики мунасивәтлик орунларниң ичкиригә келип ишләватқан вә тиҗарәт қиливатқан шинҗаңлиқ һәр милләт аммисиниң арисиға чоңқур чөкүп, уларниң хизмәт вә турмуш әһвалини чүшинип, пүтүн имканийәт билән уларниң туралғу җай, хизмәткә орунлишиш, пәрзәнтлириниң мәктәпкә кириш, кесәл көрситиш қатарлиқ тәрәпләрдики қийинчилиқлири һәм мәсилилирини һәл қилишқа ярдәм бериш" лазимлиқини тәкитлигән.

У йәнә уйғур елидин ичкири ишләшкә вә тиҗарәткә кәлгәнләр билән улар туриватқан җайлардики аһалиларниң "иттипақлиқини күчәйтиш", "өз - ара инақлиқни әмәлгә ашуруш," "һәр хил зиддийәтләрни бих һалитидә вә асас қатламда һәл қилиш" лазимлиқини тәкитлигән.

Ваң лечүән сөзидә, "зиддийәт" аталғусини ишлитиш арқилиқ түрлүк зиддийәтниң һәқиқәтән мәвҗутлуқини етирап қилған болуп, ичкиригә барған уйғурларға ятақ бәрмәслик, балилирини мәктәпкә қобул қилмаслиқ вә йәкләш, уларниң турмуш өрп - адәтлиригә һөрмәт қилмаслиқ, җисманий зәрбә бериш шуниңдәк йәнә сақчиларниң уйғурларни халиғанчә тутқун қилиш вә җазалаш һәтта хитай пуқралириниң тор бәтлири арқилиқ уйғурларни халиғанчә һақарәт қилиш қилмишлири узундин буян түрлүк ғулғулиларни қозғап кәлгән иди. Өткән йилидики шавгүән вәқәсиниң бу хил зиддийәтләрниң партлиши икәнлики билдүрүлмәктә.
 
 
Пикирләр (0)
Share
Толуқ бәт