Рим папасиниң йеңи йилда ейтқан вәзи хитайни биарам қилди

Хитай билән ватикан арисидики мунасивәтләр, йеқинқи йиллардин бери, хитайниң аталмиш вәтәнпәрвәр диний зат йетиштүрүш вә католик черкавлирини вәтәнпәрвәр католик диний затлириниң қолиға өткүзүш тиришчанлиқи сәвәбидин бәзидә рәнҗишиш вә бәзидә йириклишиш җәрянини баштин кәчүрмәктә.
Мухбиримиз шөһрәт һошур
2010-12-29
Елхәт
Пикир
Share
Принт

Бу сәвәбтин хитайдики католик черкавлири һөкүмәткә беқинғучи черкавлар вә йәр асти черкавлар болуп икки гуруппиға айрилишқа башлиған. Хитай йеқинқи айлардин бери һөкүмәткә беқинидиған черкав вә диний затларни йөләш мәқситидә, католикларниң диний паалийәтлиригә йәниму илгириләп қол тиқишқа урунғанлиқи үчүн, бу хитай ичи-сиртидики католикларниң наразилиқини қозғиған.

Рим папаси бәнәдик хви, алдинқи күни йеңи йил нутқи сөзлигәндә, хитайдики католик җамаитигә хитаб қилип, уларни диний чәклимиләр алдида бәл қоювәтмәсликкә вә үмидсизләнмәсликкә чақирған. Бу чақириқ хитай даирилирини қаттиқ биарам қилған болуп, хитай ташқи ишлар баянатчиси түнүгүн ватиканни агаһландуруп мундақ дегән: " биз ватиканниң, җуңгодики католикләр еришкән әркинликләрни тонуп йетишини вә җуңго-ватикан мунасивәтлириниң илгирилишигә пайдилиқ конкрет қәдәм бесишини үмид қилимиз."

Көзәткүчиләрниң қаришичә, ватикан хитайдики католиклардин диний ибадәтлирини хитайниң қол тиқиши вә йолйоруқлиридин халий һалда, сап роһаний муһитта елип беришини тәләп қилмақта. Хитай һөкүмити болса, хитайдики католикларниң хитай дөлитидин бәкрәк, ватиканға садиқ болуп кетишини дөләт мәнпәәтлири үчүн тәһдит дәп қаримақта.

Толуқ бәт