Хитай сиясий пәрманлирини бивастә тарқитидиған йеңи янфон тори қурди

Хитай мәркизи һөкүмити 2009 - йили 9‏ - айдин башлап 3G янфон учур тори дегән йеңи телефон сестимисини йолға қойған иди. Хоңкоңда чиқидиған 'миңпав гезити'ниң баян қилишичә, хитай мәркизи һөкүмити йеңи қурған янфон учур тори һазирқи илғар типлиқ 3G янфон қоллинидикән.
Мухбиримиз вәли
2010-01-06
Елхәт
Пикир
Share
Принт

Хитай коммунист партийә мәркизи комитетиниң тәшкилат министирлиқи бивастә башқуридиған бу янфон учур сестимисиға, коммунист партийиниң хитайдики өлкә парткомидин мәһәллә ячекилириғичә болған бир милйон секритар вә алий мәктәп оқуғучилар җәмийити башлиқлириниң исми вә тәпсилий учурлири киргүзүлгән. Бу сестима улардин қолидики янфонни һәр вақит тохтитип қоймаслиқини шәрт қилип бәлгилигән.

Хәвәрдә ейтилишичә, хитай өзиниң сиясәт вә бәлгилимилирини асаси қатлам тәшкилатлириға бивастә аңлитип туруш, улар билән болған алақини һәр вақит үзүп қоймаслиқ, техиму муһими коммунист партийә ичидә бөлүнүш йүз беришниң алдини елишни мәқсәт қилған бу тәдбирниң нәтиҗисидә, һәр қайси җайлар һөкүмәт малийисидин пул сәрп қилип, әмәлдарларға вә партийә әзалириға қиммәт баһалиқ илғар янфон сетивелип тәқсимләп беришкә башлиған.

Хәлқ һазир хитайға йеңидин импорт қилинған бундақ илғар типтлиқ янфонларни 'коммунст янфони' дәп атайду.

Хитайниң бу янфон учур сестимисиниң вә мәхсус униңда қоллинилидиған янфонларниң иҗадийәт һоқуқи кимгә мәнсуп икәнлики намәлум. Әмма хитай башлиқлири 1980‏ - йиллардин башлапла, америка президенти алдинқи сәптики һәр қандақ бир әскири яки вәзипә биҗириватқан хадими билән янфонда рәсимини көрүп туруп сөзлишип, бивастә әһвал игиләп яки буйруқ беридиғанлиқини дорашқа һәвәс қилип келивататти.

Пикирләр (0)
Share
Толуқ бәт