Dunggüendiki namayishchi ishchilar bilen saqchilar arisida tirkishish yüz bergen

Xitayning gu'angdung ölkisi dunggüen shehiride saqchilar jüme küni kochigha chiqip namayish qilmaqchi bolghan mezkur sheherdiki bir chamadan zawutining nechche yüz ishchisini zawut qorusigha soliwalghan.
Muxbirimiz erkin
2008-12-19
Élxet
Pikir
Share
Print

Dunggüen shehiridiki jyenrung chamadan zawutida yüz bergen bu weqe ishchi qisqartish, nachar xizmet shara'iti we ma'ash qisqartish qatarliq seweblerdin köpiyishke bashlighan namayishlarning eng yéngisidur.

Zawut ishchilirining chet'el axbarat agéntliqlirigha ashkarilishiche, jüme küni 30 din artuq saqchi zawutning aldini qamal qiliwalghan. Chamadan zawutidiki namayishqa yétekchilik qilghan ishchilar rehberliridin jang goxu'a isimlik birining birleshme agéntliqigha bergen melumatida saqchilarning 300 dek ishchini zawut qorusi we ishchilar yataqxana binasining etrapigha soliwélip, jüme küni etigende kochigha chiqip namayish qilishidin tosighanliqini bildürgen. Uning eskertishiche, zawuttin ayrilmaqchi bolghan bezi ishchilar tayaq yégen, bir ayal ishchining bash qisimi tayaqtin yarilinip doxturxanigha élip kétilgen.

Jang famililik yuqiriqi ishchilar aktipi, weqening 15 ‏ - noyabirda bashlan'ghanliqini, karxana rehberliri ishchilar bilen muresse qilishni ret qilghandin kéyin, ishchilarning peyshenbe küni dunggüen sheherlik hökümet da'iriliridin yardem sorap barghanliqi, lékin yardem sorap barghan ishchilarning saqchilar teripidin tayaq yégenlikini bildürgen.

Uning eskertishiche, ishchilar peyshenbe küni kéchiche hökümet binasi aldida da'irilerning jawabini kütüp yatqan bolup, jüme küni etigende saqchilar ishchilarni zawut qorusigha mejburiy qayturup kelgen.

"Junggo géziti"ning yéqinda élan qilghan bir xewiride tekitlishiche, bu yilning deslepki 9 éyida gu'angdung ölkisining xongkong bilen chégrilinidighan rayonlirida 7000 din artuq karxana taqalghan yaki bashqa jaygha yötkelgen.

Toluq bet