Bir qisim xitay öktichiler, nazaret astidiki öyge bösüp kirip nobél sahibi lyu shawboning ayalini yoqlidi

Ötken yili nobél mukapatigha érishken mehbus lyu shawboning 26 aydin béri nezerbend astida turuwatqan ayali lyushyani, mushu ayning béshida tunji bolup amérika birleshme agéntliqining muxbiri yoqlighan idi.
Muxbirimiz shöhret hoshur
2012-12-31
Élxet
Pikir
Share
Print

U bu ishni béjirishte nazaretchining chüshlük tamaqqa chiqip ketken pursitidin paydilan'ghan idi. Bu qétim yeni 31-dékabir küni, béyjingdiki öktichilerdin xu jya we yüshyawyü qatarliq kishiler nazaretchi saqchilarni bösüp ötüp lyu shya bilen körüshken.

Xitayche b b s ning xewer qilishiche, öktichiler lyu shyaning ishik aldigha kelgende aldi bilen nazaretchi saqchilardin lyu shya bilen körüshüshni telep qilghan, telep ret qilin'ghandin kéyin öktichiler nazaretchini ittiriwétp öyning ichige bösüp kirgen we lyu shya bilen 3 minut etrapida ehwallashqan.

Melum bolushiche, bu jeryanning widi'o körünüshi bir qisim tor berlerge qoyulghan bolup, körünüshtin lyu shyaning keypiyatidiki jiddiyliki we pichirlap gep qilghanliqi melum bolghan, emma uning öktichilerge éniq néme dégenliki anglanmighan. Amérika birleshme agéntliqi muxbiri ötken qétim lyu shyani ziyaret qilghanda, özining 26 aydin béri nezerbend qilin'ghanliqi, heptide bir qétim muhim sodiliqlar üchün sirtqa chiqishqa ruxset qilinidighanliqi we ayda bir qétim saqchilarning nazaritide türmige bérip yoldishi lyu shawbo bilen körüshiwatqanliqi qatarliqlarni ashkarilighan idi.

Toluq bet