Хитай: 'лю шавбо мәсилисидә ғәрб дөләтлири бизниң ички ишлиримизға арилашмақта'

Б б с ниң баян қилишичә, өткән йили декабирда қолға елинған хитай демократ лю шавбо һәққидә чаршәнбә күни хитайда сот ечилған болуп, америка, канада, австралийә вә яврупа бирлики дөләтлириниң хитайда турушлуқ әлчиханилириниң мәсул хадимлири бирлишип лю шавбониң сотини аңлаш үчүн сотқа киришкә тиришқан.
Мухбиримиз ирадә
2009-12-24
Елхәт
Пикир
Share
Принт

Игилинишичә, мәзкур сотниң қарари җүмә күни елан қилинидиған болуп, бу лю шавбониң мәсилсиигә йеқиндин көңүл бөлүватқан ғәрб дунясида рождестова байрими болидиған күнгә тоғра кәлгән.

Түнүгүн америка ташқи ишлар министирлиқи бу һәқтә баянат берип, хитайниң лю шавбониң сотини ғәрб дөләтлиридә рождестова байрими тәбриклинидиған җүмә күнигә тоғрилишиниң мәқсәтлик икәнликини ейтқан иди. Улар : "хитай бу арқилиқ ғәрб дөләтлириниң лю шавбониң сотиға болған диққитини азайтишни мәқсәт қилған. Хитайниң лю шавбони җинайи җавабкарлиққа тартиши чоң дөләт болушқа лайиқ бир иш әмәс" дегән.

Пәйшәнбә күни хитай ташқи ишлар министирлиқи баянатчиси җяң йү бейҗиңдики мухбирларни күтүвелиш йиғинида ғәрб дөләтлирини җуңгониң ички ишиға арилишиш билән әйибләп:" лю шавбо дегән хитай пуқраси, хитай уни қанунға асасән бир тәрәп қилиду. Бир қисим дөләтләр вә уларниң хитайда турушлуқ әлчиликлири бу һәқтә баянат бәрмәктә. Бу җуңгониң ички ишлириға қопаллиқ билән арилашқанлиқ болуп һесаблиниду. Җуңго буниңға қаттиқ наразилиқ билдүриду" деди.

Бу йил 54 яшқа киргән даңлиқ язғучи лю шявбо хитайдики өктичи затларниң бири иди. У өткән йили күздә кишилик һоқуқ вә демократийә тәләп қилип, хитай мәркизи һөкүмитигә йолланған "2008 низамнамиси"ни тәйярлиғучи вә буниңға қол қойғучиларниң бири.
 
Лю шявбо 2008 - йили декабирда өйидин елип кетилгәндин бери қоюп берилмигән вә 7 ай тутуп турулғандин кейин 2009 - йили 6 - айда җинайити бәлгилинип рәсмий қолға елинған. Униң җинайити "питнә иғва тарқитип, төһмәт қилиш арқилиқ дөләтниң сиясий һоқуқини тартивелишқа, сотсиялистик түзүмни ағдуруп ташлашқа урунуш" дәп бәлгиләнгән.

Б б с ниң билдүрүшичә, әгәр сот лю шавбони җинайәтчи дәп қарар чиқарса, у әң юқири болғанда 15 йиллиқ қамақ җазасиға һөкүм қилиниши мумкин икән.
 
Пикирләр (0)
Share
Толуқ бәт