Xitay: 'lyu shawbo mesiliside gherb döletliri bizning ichki ishlirimizgha arilashmaqta'

B b s ning bayan qilishiche, ötken yili dékabirda qolgha élin'ghan xitay démokrat lyu shawbo heqqide charshenbe küni xitayda sot échilghan bolup, amérika, kanada, awstraliye we yawrupa birliki döletlirining xitayda turushluq elchixanilirining mes'ul xadimliri birliship lyu shawboning sotini anglash üchün sotqa kirishke tirishqan.
Muxbirimiz irade
2009-12-24
Élxet
Pikir
Share
Print

Igilinishiche, mezkur sotning qarari jüme küni élan qilinidighan bolup, bu lyu shawboning mesilsi'ige yéqindin köngül bölüwatqan gherb dunyasida rozhdéstowa bayrimi bolidighan kün'ge toghra kelgen.

Tünügün amérika tashqi ishlar ministirliqi bu heqte bayanat bérip, xitayning lyu shawboning sotini gherb döletliride rozhdéstowa bayrimi tebriklinidighan jüme künige toghrilishining meqsetlik ikenlikini éytqan idi. Ular : "xitay bu arqiliq gherb döletlirining lyu shawboning sotigha bolghan diqqitini azaytishni meqset qilghan. Xitayning lyu shawboni jinayi jawabkarliqqa tartishi chong dölet bolushqa layiq bir ish emes" dégen.

Peyshenbe küni xitay tashqi ishlar ministirliqi bayanatchisi jyang yü béyjingdiki muxbirlarni kütüwélish yighinida gherb döletlirini junggoning ichki ishigha arilishish bilen eyiblep:" lyu shawbo dégen xitay puqrasi, xitay uni qanun'gha asasen bir terep qilidu. Bir qisim döletler we ularning xitayda turushluq elchilikliri bu heqte bayanat bermekte. Bu junggoning ichki ishlirigha qopalliq bilen arilashqanliq bolup hésablinidu. Junggo buninggha qattiq naraziliq bildüridu" dédi.

Bu yil 54 yashqa kirgen dangliq yazghuchi lyu shyawbo xitaydiki öktichi zatlarning biri idi. U ötken yili küzde kishilik hoquq we démokratiye telep qilip, xitay merkizi hökümitige yollan'ghan "2008 nizamnamisi"ni teyyarlighuchi we buninggha qol qoyghuchilarning biri.
 
Lyu shyawbo 2008 - yili dékabirda öyidin élip kétilgendin béri qoyup bérilmigen we 7 ay tutup turulghandin kéyin 2009 - yili 6 - ayda jinayiti belgilinip resmiy qolgha élin'ghan. Uning jinayiti "pitne ighwa tarqitip, töhmet qilish arqiliq döletning siyasiy hoquqini tartiwélishqa, sotsiyalistik tüzümni aghdurup tashlashqa urunush" dep belgilen'gen.

B b s ning bildürüshiche, eger sot lyu shawboni jinayetchi dep qarar chiqarsa, u eng yuqiri bolghanda 15 yilliq qamaq jazasigha höküm qilinishi mumkin iken.
 
Toluq bet