Xelq'ara olimpik komitéti xitayning 2000 - yilliq sédniy olimpik musabiqiside saxtipezlik qilip alghan médallirini inawetsiz qildi

Xelq'ara olimpik komitéti 28 - aprél küni xitayning 2000 - yili ötküzülgen sédniy olimpik musabiqiside ayallarning kolliktip gimnastika türi boyiche qolgha keltürgen mis médalini inawetsiz dep élan qildi.
Muxbirimiz irade
2010-04-29
Élxet
Pikir
Share
Print

Igilinishiche, xitay da'iriliri 2000 - yilliq séndniy olimpik musabiqiside xitay tenterbiyichi dung fangshyawning yéshini 17 yash dep körsitip musabiqige qatnashturghan bolup, dung fangshyawning eyni waqitta emdila 14 yashta ikenliki ashkarilan'ghan.
 
Weqelikning ashkarilinishi bilen xelq'ara olimpik komitéti dung fangshyawning sédniy olimpik musabiqiside we shundaqla 1999 - 2000 yilliri arisidiki xelq'ara musabiqilerde qolgha keltürgen barliq médallirini inawetsiz qilghan we xitaydin mis médalni derhal qayturup bérishni telep qilghan.

Xelq'ara olimpik komitéti yene, xitayning olimpik musabiqisining qa'ide - tüzümlirige bolupmu yash cheklimisige qet'iy ri'aye qilishini telep qilghan.

B b s ning xewer qilishiche, xitay da'iriliri "dung fangshyawning yalghan yash ishlitip musabiqige qatnishishi uning shexsi mesilisi" dep, buningdin eyni waqitta xitay hökümet da'irilirining xewiri yoqluqini ilgiri sürgen.

Xelq'ara olimpik komitéti 2008 - yili échilghan béyjing olimpik musabiqisige qatnashqan bashqa bir xitay mahirning yash ölchimige toshqan - toshmaydighanliqini tekshürüwatqanda bu musabiqide répirliq qiliwatqan dung fangshyawning yéshining saxta ikenlikini tuyuqsiz bayqap qalghan iken.

 
Toluq bet