Xitay somalidiki déngiz qaraqchilirigha 4 milyon dollar tölep ademlirini qutqazghan

Xitay metbu'ati tünügün, somalidiki déngiz qaraqchiliri teripidin bulap kétilgen bir paraxot we görüge élin'ghan kishilerning qutuldurulghanliqini xewer qilghan idi.
Muxbirimiz shohret hoshur
2009-12-29
Élxet
Pikir
Share
Print

Emma xewerde qaraqchilargha pul töligen - tölimigenliki bildürülmigen idi. Bügün roytris agéntliqining ashkarilishiche, xitay ademlirini qutuldurush üchün déngiz qaraqchilirigha 4 milyon dollar pul töligen.

Déngiz qaraqchiliridin xasin isimlik birsi tünügün xitayning déshinxu'a namliq paraxotida turup roytris muxbirining so'aligha jawab bergen. U jawabida, xitayning bir tik uchar ayropilan bilen kélip, paraxotqa 4 milyon dollar pulni tashlap bergenlikini, yene bir qanche sa'ettin kéyin paraxot we ademlerni qoyuwétidighanliqini bildürgen.

Paraxot qoyuwétilgendin kéyin, xitay tashqi ishlar ministirliqi paraxot xadimlirini tekrar agahlandurup, bixeter qirghaqqa yétiwalghiche hushyar bolushni we qaraqchilargha tekrar görüge élinip kétishtin saqlinishni tapilighan.

Xitayning mezkur paraxoti bu yil 10 ‏- ayning otturida, jenubiy afriqidin kömür toshuwatqan peytte, hindi okyanning somali etrapidin ötüwétip déngiz qaraqchiliri teripidin bulap kétilgen. Paraxotta mulazimet qiliwatqan 25 neper xitay puqrasi görüge éliwélin'ghan idi.

Ötken ayda xitay mezkur ademlirini qutuldurush üchün, herbiy küchliridin teshkillen'gen bir qutquzush etriti ewetken bolsimu, qutquzushqa qurbi yetmigen, aqiwette, xitay somalidiki diniy zat we jama'et erbabliri bilen körüshüp, déngiz qaraqchiliri bilen sodilishishning yolini izdigen idi.

Toluq bet