Хитай терроризмға очуқ тәбир беридиған қанун лайиһисини музакирә қилмақта

Хитайниң мәмликәтлик хәлқ қурултийи дүшәнбә күни ачқан йиғинида «терроризмға қарши һәрикәткә йетәкчилик қилидиған қануний бәлгилиминиң» лайиһисини мақуллиған.
Мухбиримиз ирадә
2011-10-25
Елхәт
Пикир
Share
Принт

«Террорлуқ һәрикәтлири», «террорлуқ тәшкилатлири» вә «террорчилар» дегән уқумларға ениқ чүшәнчә бериш тәклип қилинған мәзкур қанун лайиһисидә, терроризмға қарши күрәш хизмитигә йетәкчилик қиливатқан алақидар органларниң террорлуқ тәшкилатлири вә террорчиларни ениқ муәййәнләштүрүп, уни җәмийәткә очуқ - ашкара елан қилиши оттуриға қоюлған.

Бирләшмә агентлиқиниң хәвәр қилишичә, хитай җамаәт хәвпсизлики министирлиқиниң муавин министири яң хуәнниң мәзкур қанун лайиһисиниң терроризмға зәрбә бериш һәрикитини күчләндүрүп, террорчиларни җазалашни асанлаштурушни мәқсәт қилидиғанлиқини, террорлуқ тәшкилатлири вә террорчиларға ениқ тәбир бәргәндә хәлқара җәмийәтниңму ярдимигә еришкили болидиғанлиқини ейтқан.

Мәзкур лайиһә бойичә болғанда, шиддәт вә бузғунчилиқ йоли арқилиқ һөкүмәткә тәһдит қилиш вә яки бир ишқа мәҗбурлаш, қутратқулуқ қилиш, бу хил һәрикәт вә шәхсләрни малийә яки башқа хил ярдәмләр арқилиқ қоллашниң һәммиси террорлуқ болуп һесаблинидикән. Көзәткүчиләр, бу қанун ишқа киришкән тәқдирдә, хитайдики һөкүмәтниң иҗралириға наразилиқ билдүрүп елип берилған һәрқандақ һәрикәт шундақла өктичи шәхсләрниңму террорлуқ тизимликигә елиниши мумкинликини агаһландуруп, «қанун лайиһисидики маддилар кишини әндишигә салиду», дәп көрсәтмәктә.

Б б с, бирләшмә агентлиқи, ройтерсқа охшаш агентлиқлар тәрипидин елан қилинған бу һәқтики хәвәрләрдә, хитай һөкүмитиниң асасән уйғур тәшкилатлирини террорлуқ билән әйибләйдиғанлиқи, униң уйғур елидә йүз бәргән һәрқандақ наразилиқ һәрикитини чәтәлләрдики тәшкилатларға бағлап кәлгәнлики алаһидә әскәртилгән.

Пикирләр (0)
Share
Толуқ бәт