Xitay térrorizmgha ochuq tebir béridighan qanun layihisini muzakire qilmaqta

Xitayning memliketlik xelq qurultiyi düshenbe küni achqan yighinida "Térrorizmgha qarshi heriketke yétekchilik qilidighan qanuniy belgilimining" layihisini maqullighan.
Muxbirimiz irade
2011-10-25
Élxet
Pikir
Share
Print

"Térrorluq heriketliri", "Térrorluq teshkilatliri" we "Térrorchilar" dégen uqumlargha éniq chüshenche bérish teklip qilin'ghan mezkur qanun layihiside, térrorizmgha qarshi küresh xizmitige yétekchilik qiliwatqan alaqidar organlarning térrorluq teshkilatliri we térrorchilarni éniq mu'eyyenleshtürüp, uni jem'iyetke ochuq - ashkara élan qilishi otturigha qoyulghan.

Birleshme agéntliqining xewer qilishiche, xitay jama'et xewpsizliki ministirliqining mu'awin ministiri yang xu'enning mezkur qanun layihisining térrorizmgha zerbe bérish herikitini küchlendürüp, térrorchilarni jazalashni asanlashturushni meqset qilidighanliqini, térrorluq teshkilatliri we térrorchilargha éniq tebir bergende xelq'ara jem'iyetningmu yardimige érishkili bolidighanliqini éytqan.

Mezkur layihe boyiche bolghanda, shiddet we buzghunchiliq yoli arqiliq hökümetke tehdit qilish we yaki bir ishqa mejburlash, qutratquluq qilish, bu xil heriket we shexslerni maliye yaki bashqa xil yardemler arqiliq qollashning hemmisi térrorluq bolup hésablinidiken. Közetküchiler, bu qanun ishqa kirishken teqdirde, xitaydiki hökümetning ijralirigha naraziliq bildürüp élip bérilghan herqandaq heriket shundaqla öktichi shexslerningmu térrorluq tizimlikige élinishi mumkinlikini agahlandurup, "Qanun layihisidiki maddilar kishini endishige salidu", dep körsetmekte.

B b s, birleshme agéntliqi, roytérsqa oxshash agéntliqlar teripidin élan qilin'ghan bu heqtiki xewerlerde, xitay hökümitining asasen Uyghur teshkilatlirini térrorluq bilen eyibleydighanliqi, uning Uyghur élide yüz bergen herqandaq naraziliq herikitini chet'ellerdiki teshkilatlargha baghlap kelgenliki alahide eskertilgen.

Toluq bet