Хитай ядро реакторида кашила көрүлгәнликини рәт қилди

Йеқинда японийә ахбарат васитилири хәвәр елан қилип, 2011-йили өктәбирдә бейҗиңниң сиртиға җайлашқан тез нейтрон реакторини ток билән тәминләйдиған системида кашила чиқип, ядро реакториниң һәрикәт қилиштин тохтап қалғанлиқини билдүрди.
Мухбиримиз ирадә
2012-01-26
Елхәт
Пикир
Share
Принт

Бу ядро електр истансиси өткән йили 7-айда ишқа кириштүрүлгән болуп, худди японийиниң фукушима ядро електр истансисиға охшашла қоюқландурулған уранни йеқилғу мадда қилип ишлитидикән.

Б б с ниң хәвәр қилишичә, япон ахбарат васитилири хәвиридә, бейҗиңдики бу ядро електр истансисида ядрониң сиртқа тарқап кетишиниң алдини алидиған бихәтәрлик системисиниң мәвҗут әмәсликини вә контрол қилиш мәркизидә хизмәтчи хадимлар ухлайдиған кариват барлиқини тилға елип, ядро реакториниң бихәтәрлик өлчимини интайин төвән, дәп көрсәткән.

Хәвәр тарқалғандин кейин, хитай атом енергийә тәтқиқат мәркизиниң башлиқи вән гаң баянат берип, японийә ахбарат васитилиридә елан қилинған хәвәрниң асассизлиқини илгири сүрди. У бу ядро електр истансисиниң бултур 7-айда синақ тәриқисидә ишлитилгәндин бери қайта мәшғулат қилмиғанлиқини, шуңа қандақтур ядро сиртқа йейилип кетип, хәлқниң саламәтликигә вә муһитқа тәсир йәткүзгәнликидин сөз ечишниң мумкин әмәсликини ейтқан.

Мәзкур ядро реактори бейҗиң шәһириниң фаң сән райониға 40 километир келидиған йәргә орунлашқан болуп, ядро електр истансилири муһит қоғдаш тәшкилатлириниң изчил тәнқидигә учрап кәлмәктә. Болупму өткән йил японийидә йүз бәргән йәр тәврәш апитидин кейин ядро реакторлириниң бихәтәрлики техиму кәң талаш-тартиш яратқан иди.

Һазир явропа иттипақидики дөләтләр муһит қоғдаш тәшкилатлириниң бесими астида ядро електр истансилирини қуруштин ваз кәчти. Әмма дуняда хитай, русийә вә һиндистан һелиһәм бу хил техникини қоллинип кәлмәктә.

Пикирләр (0)
Share
Толуқ бәт