Xitay yadro ré'aktorida kashila körülgenlikini ret qildi

Yéqinda yaponiye axbarat wasitiliri xewer élan qilip, 2011-yili öktebirde béyjingning sirtigha jaylashqan téz néytron ré'aktorini tok bilen teminleydighan sistémida kashila chiqip, yadro ré'aktorining heriket qilishtin toxtap qalghanliqini bildürdi.
Muxbirimiz irade
2012-01-26
Élxet
Pikir
Share
Print

Bu yadro éléktr istansisi ötken yili 7-ayda ishqa kirishtürülgen bolup, xuddi yaponiyining fukushima yadro éléktr istansisigha oxshashla qoyuqlandurulghan uranni yéqilghu madda qilip ishlitidiken.

B b s ning xewer qilishiche, yapon axbarat wasitiliri xewiride, béyjingdiki bu yadro éléktr istansisida yadroning sirtqa tarqap kétishining aldini alidighan bixeterlik sistémisining mewjut emeslikini we kontrol qilish merkizide xizmetchi xadimlar uxlaydighan kariwat barliqini tilgha élip, yadro ré'aktorining bixeterlik ölchimini intayin töwen, dep körsetken.

Xewer tarqalghandin kéyin, xitay atom énérgiye tetqiqat merkizining bashliqi wen gang bayanat bérip, yaponiye axbarat wasitiliride élan qilin'ghan xewerning asassizliqini ilgiri sürdi. U bu yadro éléktr istansisining bultur 7-ayda sinaq teriqiside ishlitilgendin béri qayta meshghulat qilmighanliqini, shunga qandaqtur yadro sirtqa yéyilip kétip, xelqning salametlikige we muhitqa tesir yetküzgenlikidin söz échishning mumkin emeslikini éytqan.

Mezkur yadro ré'aktori béyjing shehirining fang sen rayonigha 40 kilométir kélidighan yerge orunlashqan bolup, yadro éléktr istansiliri muhit qoghdash teshkilatlirining izchil tenqidige uchrap kelmekte. Bolupmu ötken yil yaponiyide yüz bergen yer tewresh apitidin kéyin yadro ré'aktorlirining bixeterliki téximu keng talash-tartish yaratqan idi.

Hazir yawropa ittipaqidiki döletler muhit qoghdash teshkilatlirining bésimi astida yadro éléktr istansilirini qurushtin waz kechti. Emma dunyada xitay, rusiye we hindistan hélihem bu xil téxnikini qollinip kelmekte.

Toluq bet