Yawropa diplomatliri xitayning nobil tinchliq mukapatini tarqitish murasimigha qatnashmasliq telipini ret qildi

Yawropa diplomatliri xitayning kéler ay 10 ‏- dékabirda ötküzülidighan bu yilliq nobil tinchliq mukapatini tarqitish murasimigha qatnashmasliq telipini ret qilip, bu yilliq mukapat tarqitish murasimigha her yilqigha oxshashla qatnishidighanliqini bildürgen.
Muxbirimiz erkin
2010-11-05
Élxet
Pikir
Share
Print

Roytérs axbarat agéntliqining jüme küni xewer qilishiche, gérmaniyining oslodiki elchixanisining mu'awin mes'uli jéyn fédirik "bizning meydanimiz éniq, biz her yili qatniship kéliwatqandek bu yilmu qatnishimiz" dégen.

Jéyn fédirikning eskertishiche, ular oslodiki bashqa yawropa elliri elchixaniliri bilen xitayning murasimgha qatnashmasliqni telep qilip yazghan xéti üstide pikir almashturghan. Oslodiki en'gliye tashqi ishlar ministirliqi wekili xitayning xétige inkas qayturup, "xitay bu mesilini bizning aldimizgha qoydi. Lékin, norwégiyide turushluq en'gliye elchisining nobil tinchliq mukapatini tarqitish murasimigha qatnishishi normal ehwal. Bash elchi bu yilmu murasimgha qatnishishi mumkin" dep tekitligen.
 
Roytérs axbarat agéntliqining oslodiki ismini ashkarilashni xalimaydighan bashqa bir yawropa diplomatik emeldarining sözini neqil keltürüp eskertishiche, nurghun yawropa elliri bu yilmu adettikidek normal xizmet qa'idisini qilip, 10 - dékabirdiki murasimgha qatnishiwérishi mumkin.

Xitay hökümet emeldarliri yéqindin béri oslo we béyjingdiki yawropa elliri diplomatliri bilen uchriship we ulargha xet yézip, lyu shawbogha nobél tinchliq mukapati bérish murasimigha qatnashmasliqni telep qilghan. Lékin nobél komitétining katipi lundistad jüme küni norwégiyining "afténpostén" gézitige bayanat bérip, "men shuninggha ishinimenki, murasim debdebilik bolidu we murasimgha qatnishish üchün (oslo) sheherlik hökümet zalining orunduqini talishish kürishi yüz béridighanliqini körimiz" dégen.

 
Toluq bet