جەنۇبىي خىتاينىڭ بىر قىسىم جايلىرى يامغۇر ئاپىتىگە ئۇچراپ 65 ئادەم ئۆلگەن

خىتاينىڭ مۇناسىۋەتلىك ئورگانلىرى تارقاتقان ئۇچۇرلارغا قارىغاندا، خىتاينىڭ سىچۈەن ۋە جياڭشى قاتارلىق ئۆلكىلىرى يامغۇر ئاپىتىگە ئۇچراپ 65 ئادەم ئۆلگەن ۋە 14 ئادەم يوقاپ كەتكەن.
ﻣﯘﺧﺒﯩﺮﯨﻤﯩﺰ ﺟﯘﻣﻪ
2010-05-08
ئېلخەت
پىكىر
Share
پرىنت

خىتاي دۆلەتلىك كەلكۈندىن مۇداپىئە كۆرۈش ۋە قۇرغاقچىلىققا تاقابىل تۇرۇش باش قوماندانلىق شتابى تارقاتقان ئۇچۇردا ئاشكارىلىنىشىچە، 5 - مايدىن باشلاپ خىتاينىڭ سىچۈەن، چۇڭچىڭ، گۇيجۇ، جياڭشى ۋە گۇاڭدۇڭ قاتارلىق ئۆلكىلىرى يامغۇر ۋە مۆلدۈرنىڭ تۇيۇقسىز ھۇجۇمىغا ئۇچرىغان. نەتىجىدە 2 مىليون 550 مىڭ ئادەم ئاپەتنىڭ تەسىرىگە ئۇچرىغان.

مەلۇم بولۇشىچە، ئاپەت چۇڭچىڭدا بىر قەدەر ئېغىر بولغان بولۇپ، ئۆلگەن ئادەم 31 گە، يوقاپ كەتكەن ئادەم 1 گە يەتكەن. چۇڭچىڭ ھۆكۈمىتى 85 مىڭ ئادەمنى باشقا جايلارغا يۆتكىگەن.

يۇقىرىقى رايونلاردا كەلكۈن ئاپىتى يۈز بېرىپلا قالماي بەزى سۇ ئامبارلىرىدا سۇ يۈزى ئۆرلەپ كېتىش ياكى سۇ تېشىپ كېتىش ھادىسىلىرىمۇ كۆرۈلۈشكە باشلىغان.

شىنخۇا ئاگېنتلىقىدا كۆرسىتىشىچە، يەرلىك ھاۋارايى ئىدارىلىرى جياڭشى، خۇنەن قاتارلىق رايونلاردا يەنە نەچچە كۈن يامغۇر ياغىدىغانلىقىنى بىلدۈرگەن.

پىكىرلەر (0)
Share
تولۇق بەت