Уйғур елидин йәнә бир түркүм яш хитайниң җяңсу өлкисигә тәрбийилинишкә әвәтилди

Хитайниң шинхуа хәвәр торидин мәлум болушичә, бу йил өктәбир ейида уйғур елидин 1415 нәпәр яш хитайниң җяңсу өлкисигә қайта тәрбийилинишкә әвәтилгән.
Мухбиримиз меһрибан
2012-10-16
Елхәт
Пикир
Share
Принт

Хитайниң һөкүмәт хәвиридә бу яшларниң қайси саһәләрдә тәрбийилинидиғанлиқи һәққидә ениқ мәлумат берилмигән болсиму, әмма даириләр уларниң җяңсудики алий мәктәпләрдә бир йил тәрбийиләнгәндин кейин, уйғур аптоном районидики йеза, базар, кәнт, мәһәллиләрдики асасий қатлам хизмәтлиригә тәқсим қилинидиғанлиқини билдүргән.

Игилигән учурлардин мәлум болушичә, бу яшлар 2009-йилдин илгири университетларни түгитип иш күтүп турған оқуғучилар болуп, 2010-йилдин буян даириләрниң уйғур районидики алий мәктәпләрни түгәткәндин кейин ишқа орунлишалмиған яшларни түркүм-түркүмләп хитай өлкилиригә «қайта тәрбийиләш» намида әвәтиши, уйғур вәзийитини көзәткүчиләрниң диққитини тартқан.

Әһвалдин хәвәрдар кишиләрниң билдүрүшичә, бу курсантларға нуқтилиқ һалда хитай тили, хитай коммунист партийә тарихи вә хитайниң миллий сиясити қатарлиқ дәрсләр өтилидиған болуп, көзәткүчиләр даириләрниң «қайта тәрбийиләш» дегининиң, әмәлийәттә меңә ююш тәрбийиси болуп, уйғур елидә хитай коммунист һөкүмитигә садиқ бир түркүм асаси қатлам кадирлирини тәрбийиләшни мәқсәт қилғанлиқини илгири сүрмәктә.

Пикирләр (0)
Share
Толуқ бәт