Ху җинтав түркмәнистанни зиярәт қилди

Хитай дөләт рәиси ху җинтав қазақистан сәпирини ахирлаштурғандин кейин, 13 - декабир күни түркмәнистан пайтәхти ашхабадқа йетип келип, түркмән президенти қурбангүл бәрдимуһәммәдоф билән көрүшүп, икки дөләт һәмкарлиқ мунасивити һәққидә пикир алмаштурди һәмдә хитай билән түркмәнистан арисида бир қатар келишимлар имзаланди.
Мухбиримиз үмүдвар
2009-12-13
Елхәт
Пикир
Share
Принт
 
Б б с агентлиқиниң хәвәр қилишичә, бу қетим һасил қилинған келишимлар ичидә хитай тәрәпниң түркмәнистанниң хитайда ишләнгән йолучилар пойизи вагонлирини сетивелиши һәмдә түркмәнистанниң алақә системиси қурулуши үчүн төвән пирсәнт билән қәрз бериш пүтүшүми бар икән.

Хитайниң шинхуа агентлиқиниң бу һәқтики хәвиридин мәлум болушичә, ху җинтав қурбангүл бәрди муһәммәдоф билән болған сөһбитидә икки дөләт мунасивәтлириниң тәрәққиятиға юқири баһа бәргән һәмдә енергийә саһәсидики һәмкарлиқларни техиму чоңқурлитишни тәкитлигән шуниңдәк хитай - оттура асия тәбиий газ туруба йолиниң нормал хизмитини капаләтләндүрүдиғанлиқини билдүргән.

Ху җинтав қурбангүл бәрди муһәммәдоф билән елип барған сөһбитидә йәнә кона тема "үч хил күч"ләргә ортақ зәрбә бериш мәсилисиниму унтуп қалмиған болуп, у, "үч хил күчләрниң оттура асиядики паалийәтлири райондики һәр қайси мәмликәтләрниң муқимлиқи үчүн еғир тәһдит, җуңго түркмәнистан билән болған һәмкарлиқни күчәйтип, үч хил күчләргә зәрбә беришни халайду" дәп көрсәткән.

Бу қетим йәнә хитай тәрәп икки мәмликәтниң маарип саһәсидики һәмкарлиқлириниң илгириләватқанлиқиниң ипадиси сүпитидә һәр йили түркмәнистанға бериватқан 45 кишилик хитай тәрәпниң оқуш мукапат пулини 90 кишигә көпәйткәнликини билдүргән президент қурбангүл бәрди муһәммәдофму икки дөләт һәмкарлиқлирини муәййәнләштүргән һәмдә ху җинтавниң шәрипигә зияпәт бәргән.

Мәлум болушичә, ху җинтавниң бу қетимлиқ зияритиниң түп мәқсити енергийә мәсилисигә бағлиқ болуп, хитай билән түркмәнистан арисида һәр йили 30 милярд куб метир тәбиий газ йәткүзүш келишими бар. Дүшәнбә күни түркмәнистанниң саһибханлиқида ашхабадта хитай, түркмәнистан, өзбекистан вә қазақистан рәһбәрлириниң оттура асия - хитай тәбиий газ турубисини ишқа кириштүрүш мурасими паалийити өткүзүлүш алдида турмақта.
Пикирләр (0)
Share
Толуқ бәт