Yapon axbarat wasitiliri shimaliy koriyining rakétalirigha yéqilghu qoyghanliqini xewer qildi

Yaponiye xewer agéntliqliri shimaliy koriye hökümitige yéqin ishenchlik menbedin érishken uchurgha asasen shimaliy koriyining sinaq qilmaqchi bolghan rakétasigha yéqilghu qoyghanliqini, rakétaning aldimizdiki ayning 12-13 künliri qoyup bérilishi mumkinlikini xewer qildi.
Muxbirimiz irade
2012-03-29
Élxet
Pikir
Share
Print

Jenubiy koriye mudapi'e ministirimu yekshenbe künidiki bayanatida, shimaliy koriyining rakéta asasiy gewdisini sinaq meydanigha yötkep mangghanliqini bildürgen idi.

Shimaliy koriye uzun musapilik rakéta siniqi élip baridighanliqini jakarlighandin kéyin, amérika, jenubiy koriye we yaponiye qatarliq döletler buninggha qattiq naraziliq bildürüp, uni yadro qorallirini sinaq qilishni toxtitish heqqide qilghan wedisige xilapliq qilish bilen eyibligen idi.

Charshenbe küni amérika hökümiti shimaliy koriyige qilmaqchi bolghan yémeklik yardimini emeldin qalduridighanliqini jakarlidi. Aqsaraydin bérilgen bayanatta shimaliy koriyige, wedisige emel qilmighan we qiliniwatqan yardemlerning nege kétidighanliqi éniq bolmighan bir shara'it astida yardem bérishning mumkin emesliki bildürüldi.

Nöwette yaponiye, amérika we jenubiy koriyiler shimaliy koriyining bu siniqigha qandaq taqabil turush heqqide jiddiy muzakiriler élip barmaqta. Bügün amérika mudapi'e ministirliqi pentagonning générali shimaliy koriyining bu rakéta bilen birlikte yene, intérnét arqiliq hujum qozghiyalaydighan iqtidarnimu yétildürgenlikini bildürgen.

Toluq bet