Yaponiye bash weziri na'uto kan 2011‏- yili xitayni ziyaret qilishni oylashmaqta iken

Yaponiye bash ministiri na'uto kan 2011‏- yili xitayni ziyaret qilip, ötken yili 9 ‏- ayda sénkako taqim arilining etrapida yüz bergen xitay béliqchilar kémisi bilen yaponiye charlash paraxotining öz ara soqulup kétish sewebidin jiddiyliship ketken yaponiye -xitay munasiwitini eslige keltürüshni oylashmaqta iken.
Muxbirimiz erkin
2010-12-31
Élxet
Pikir
Share
Print

"Kyudo "axbarat agéntliqining jüme küni weqedin xewerdar yaponiye hökümet emeldarlirining sözini neqil keltürüp xewer qilishiche, nöwette yaponiye terep na'uto kanning xitayni ziyaret qilishigha shert shara'it hazirlash üchün türlük qanallarni ishqa saqlimaqta iken. Xewerde na'uto kanning sabiq yaponiye tashqi ishlar ministiri séyji mahixara xitaygha ewetip, özining ziyaritini yol échishni oylishiwatqanliqi ilgiri sürüldi.

"Kyudo" agéntliqining xewiride ilgiri sürüshiche, eger hemme ish tosalghusiz mangsa, na'uto kan xitay dölet re'isi xu jintaw bilen uchurushup, ikki döletning öz ara istratégiyilik menpe'etdarliq munasiwitini turghuzmaqchi iken.

 Ötken yili 9 ‏- ayda yüz bergen xitay - yaponiye paraxot weqesidin kéyin ikki dölet munasiwiti téz chékinip, her ikki dölet puqralirida bir-birige qarshi öchmenlik keypiyati kücheygen idi.

 Yaponiye özining yéqinda élan qilghan "mudapi'e qollanmisi" da xitayning herbiy küchini diqqet bilen közitilidighan nishan, dep élan qilghan. Yaponiyining xitayni özining mudapi'e qollanmisidiki tehdit nishanlirining biri, dep élan qilishi béyjing hökümitining naraziliqini qozghighan. Xongkong metbu'atlirining xewer qilishiche, xitay hökümiti bu munasiwet bilen yaponiye naraziliq bildürgen.

Bezi közetküchiler, yaponiye- xitay ikki dölet rehbirining bir birini ziyaret qilip öz ara uchurushushigha nurghun tosalghularning barliqini ilgiri sürmekte.

Toluq bet