Kishilik hoquqni közitish teshkilati yawropa ittipaqidin xitay kishilik hoquq mesiliside konkrét netije qazinishni telep qildi

Kishilik hoquqni közitish teshkilati düshenbe küni axbarat élan qilip, yawropa ittipaqidin seyshenbe küni ispaniye paytexti madrid shehiride bashlinidighan, yawropa - xitay kishilik hoquq di'alogida konkrét netijige érishishni telep qildi.
Muxbirimiz shohret hoshur
2010-06-29
Élxet
Pikir
Share
Print

Axbaratta yawropa - xitay kishilik hoquq di'alogining xitayda kishilik hoquqni qoghdash rolini oynishini telep qilip, "5‏ - iyul weqesi"din kéyin xalighanche tutqun qilin'ghan we iz ‏ - déreksiz yoqap ketken Uyghurlarning iz ‏ - dérikini qilishni telep qildi.

Axbaratta yene, ürümchidiki weqege chétilip sotlan'ghan Uyghurlarning xelq'ara ölchem we qanun'gha uyghun usullar bilen adil sotlinishigha kapaletlik qilishni eskertip, siyasiy mehbuslarni solaydighan "qara türme" mesilisini otturigha qoyushni telep qildi.

Xitay bilen yawropa ittipaqi her ikki yilda bir qétim kishilik hoquq di'alogi ötküzüp kelmekte idi. Lékin yéqindin béri kishilik hoquq teshkilatliri xitay - yawropa kishilik hoquq di'alogining héchqandaq emeliy netijisi bolmighanliqini tenqidlep, yawropa ittipaqini kishilik hoquqni soda bilen birleshtürüshke chaqirghan idi.

Kishilik hoquqni közitish teshkilati yene, yawropa ittipaqining madridtiki yighinda xitaygha bésim ishlitip, b d t ning "puqralar hoquqi we siyasiy heqler ehdinamisi"ni ijra qilishni telep qilish, bu mesilide resmiy waqit jedwili otturigha qoyushni tekitligen.

Toluq bet