Yemen prézidénti yil axirida texttin chüshidighanliqini bildürdi

Roytirs agéntliqining xewer qilishiche, yemen prézidénti aliy abldullah salih, öktichi küchlerge özining bu yil axirida istépa béridighanliqini,kéler yili 1-ayda bolsa yemende saylam ötküzülidighanliqini bildürgen.
Muxbirimiz shöhret hoshur
2011-03-22
Élxet
Pikir
Share
Print

U özining bu arqiliq hakimiyetni tinch we tertiplik bir shekilde ötküzüp bérish pilani barliqini eskertken. U nechche waqtin béri, özining taki kéler qétimliq prézidént saylimighiche yeni 2013‏-yiligha qeder wezipisini dawamlashturidighanliqini bildürgen idi. Öktichi küchler prézidént salihning bu teklipini ret qilghan we texttin derhal chüshüshni telep qilghan.

Xewerde bildürülüshiche, prézidént salihning namayishchilargha qarshi meydanidiki bu tür yumshash, yemen armiyisining gholluq généralliridin biri bolghan muhsin el exmerning namayishchilar sépige ötüp kétishi seweb bolghan.

Aldinqi küni prézidént salihqa sadaqetmen saqchilardin biri namayishchilargha oq chiqirip 50din artuq kishining ölümige seweb bolghan.

Buning bilen général muhsin el ehmer özining namayishchilarni qollaydighanliqini ashkara bildürüp, namayishchilarni qoghdash üchün bir qisim esker we ofitsérlirini yéteklep namayishchilar sépige qétilghan. Prézidént salih bügünki sözide "Yemenning herbiy da'iriliri arisida bölünüsh peyda bolsa, yaki yemende bir herbiy özgirish yüz berse, bu yemende ichki urushqa seweb bolidu" dep agahlandurghan.

Öktichi küchlerning bayanatchisi prézidént salihning teklipini roytirsqa ashkarilighan chéghida, nöwettiki sa'etlerning yemen weziyiti üchün hel qilghuch sa'etler ikenlikini bildürgen.

Toluq bet