Уйғур районлуқ һөкүмәт иқтисадий тәдбир бәлгиләштә тунҗи қетим йәрлик хәлқни есигә кәлтүрди

Хитайниң уйғур районлуқ һөкүмити йеқинда алий мәктәп вә техникомларни пүттүргәнләрни ишқа орунлаштурушни тезлитиш һәққидә йеңи бәлгилимә түзүп чиқти.
Мухбиримиз шөһрәт һошур
2012-08-22
Елхәт
Пикир
Share
Принт

Бәлгилимидә алий мәктәп вә техникомларни пүттүргәнләрни ишқа алған ширкәт вә карханиларға баҗ кәчүрүм қилиш вә төвән өсүмлүк қәрз берип туруш қатарлиқ түзүмләр бекитилгән. Бәлгилимидә, уйғур райониниң җәнубидики икки вилайәт вә бир областтин, болупму бу җайдики аз санлиқ милләтләрдин хизмәтчи қобул қилғанларға, етибарниң йәниму ашуруп берилидиғанлиқи бекитилгән.

Бу 5-июл вәқәсидин кейин йәни хитай мәркизи һөкүмити шинҗаң хизмити йиғини ачқандин кейин, әмәлий иқтисадий тәдбир бәлгиләштә, йәрлик хәлқни тунҗи қетим есигә кәлтүрүшидур. Хитайниң буниңдин бурунқи етибар сиясәтлиридә, йәрлик хәлқ пәрқләндүрүлмигәчкә, мәркәзниң етибар сиясәтлиридин йәнила уйғур районидики хитайларниң пайдилинишиға йол ечилип кәлгән.

Гәрчә, уйғур районлуқ һөкүмәтниң бу қетимқи йеңи бәлгилимисидә, уйғур яшлириниң ишсизлиқ мәсилисигә чарә болалиғудәк дәриҗидә тәдбирләр болмисиму, даириләрниң иқтисади мәнпәәт мәсилисидә тунҗи қетим йәрлик хәлқләрни есигә кәлтүрүши район вәзийитини көзитиватқан уйғур көзәткүчиләр тәрипидин, әгәр әмәлийләшкән тәқдирдә иҗабий бир қәдәм һесаблиниду дәп қаралмақта.

Дуня уйғур қурултийиниң баянатчиси дилшат ришит бүгүн бу һәқтә пикир баян қилип, хитайниң һазирға қәдәр ялғуз муқимлиқ һәққидә йиғин ачқандила әмәс, иқтисадий мәнпәәт һәққидә музакирә елип бериватқандиму, йәрлик хәлқләрни ойлишиши керәкликини вә хитайниң бу җәһәттә бесишқа тегишлик йәнә көплигән қәдәмлири барлиқини әскәртип өтти.

Пикирләр (0)
Share
Толуқ бәт