«Шинҗаң мәдәнийити» журнилиниң сабиқ баш муһәррири қурбан мамутниң тутқунда икәнлики дәлилләнди

Мухбиримиз шөһрәт һошур
2020-05-21
Елхәт
Пикир
Share
Принт
«Устаз журналист, шаир қурбан мамутқа тон кийдүрүш мурасими» намлиқ йиғинда (оңдин солға) ялқун рози, қурбан мамут,вә абдуқадир җалалидин әпәндиләр. 2013-Йили 15-май,
«Устаз журналист, шаир қурбан мамутқа тон кийдүрүш мурасими» намлиқ йиғинда (оңдин солға) ялқун рози, қурбан мамут,вә абдуқадир җалалидин әпәндиләр. 2013-Йили 15-май,
ts.cn

Уйғур райондики нопузлуқ журналлардин «шинҗаң мәдәнийити» журнилиниң сабиқ баш муһәррири, төһпикар журналист қурбан мамут ғайиб болғиниға 3 йил болуп қалған болсиму, әмма аилә-тавабиатлири униң ақиивити һәққидә хитай даирилиридин та һазирғичә рәсмий бир уқтуруш тапшуруп алмиған иди.

Мухбиримизниң үрүмчидики алақидар идарә-органларға қарита елип барған телефон зиярәтлири давамида қурбан мамутниң тутқунда икәнлики сабиқ хизмәт орни тәрипидин тунҗи қетим дәлилләнди.

Сәвәбсиз тутуп әкетиш вә әкетилгәнликини аилисигә билдүрмәслик вә һәтта нәдә тутуп турулуватқанлиқини тутқунниң өзидинму мәхпий тутуш уйғур районида йеқинқи үч йилда давам қилған тутқун һәрикитидә көп көрүлгән бир һадисидур.

Шу сәвәбтин болса керәк, «шинҗаң мәдәнийити» журнилиниң сабиқ баш муһәррири қурбан мамут 2017‏-йилиниң ахирида уштумтут ғайиб болуп кәткәндин кейин униң америкадики оғли бәһрам синташ дадиси һәққидә та һазирғичә рәсмий (даириләр тәминлигән) бир мәлуматқа еришәлмәй кәлгән.

Бирқанчә айдин бериқи ениқлашлиримиз давамида телефонимизни қобул қилған уйғур аптоном районлуқ мәдәнийәт назарити қармиқидики бәзи хадимлар қурбан мамутни тонумайдиғанлиқини билдүрсә, бәзи хадимлар униң әһвалидин хәвәрсизликини ейтқан иди.

Бәһрам синташ уйғур райониниң йеқинқи 3 йилдики омумий вәзийити, болупму әлсөйгән даңлиқ зиялийларниң қисмитигә қарап туруп дадисиниң тутқунда икәнликини пәрәз қилған. Болупму үрүмчидики аилә-тавабиати униңға дадиси һәққидә гәп соримаслиқни бәзидә әгитип, бәзидә ашкара баян қилғандин кейин у дадисиниң тутулуп кәткәнликини көңлидә җәзмләштүргән иди. Өткән айда телефонимизни қобул қилған үрүмчи шәһәрлик мәдәнийәт идарисиниң хадими бу һәқтә мәдәнийәт назаритидин мәлумат елишимизни тәвсийә қилған иди.

Төһпикар журналист қурбан мамут 1950-йили куча наһийәси беһишбағ йеза, бостан кәнтидә туғулған, 1976-йили. Шинҗаң университетиниң әдәбият факултетини пүттүргәндин кейин 1984-йилғичә шинҗаң хәлқ радийо истансисида мухбир, муһәррир болуп хизмәт қилған. 1985-Йилдин 2011-йилғичә «шинҗаң мәдәнийити» журнилида мәсул муһәррир, баш муһәррир болуп ишләп, пенсийәгә чиққан.

Бу журналниң нопузи вә төһпикар журналистниң тәсири бәһрам синташниң дадиси һәққидә учурға еришишини техиму қийинлаштурған. У аилә-тавабиатиниң үндидаридики сүрәтлири вә кәйпиятиға қарап туруп дадисиниң 2017-йили 11‏-айларда тутуп кетилгәнликини тәхмин қилған. Ениқлашлиримиз давамида бәзи алақидар хадимлар қурбан мамут хизмәт қилған «шинҗаң мәдәнийити» журнилиниң телефон номурини тәминләшниму рәт қилди.

Бәһрам синташ һазирға қәдәр дадиси һәққидә учур елиш үчүн иҗтимаий таратқуларда актип паалийәтләрни қилған. У «мәнму уйғур», «қериндашлиримиздин техичә учур йоқ» қатарлиқ һәштәг паалийитиниң башламчиси болған. Хитай даирилири бу һәрикәткә инкас қайтуруп, бир түркүм уйғур паалийәтчилириниң ғайиб болған уруқ-туғқанлирини ахбарат арқилиқ хәлқара җамаәткә көрсәткән, әмма бәһрам синташниң шикайитигә җаваб бәрмигән, йәни төһпикар журналист қурбан мамут һәққидә еғиз ачмиған иди. Бу һәқтә мәдәнийәт назаритигә қарита елип барған телефон зиярәтлиримиз изчил җавабсиз қалдурулған иди.

Журналист қурбан мамут баш муһәррир мәзгилидә «шинҗаң мәдәнийити» журналида уйғур җәмийитиниң әң мурәккәп вә назук мәсилилири, илмий вә әдәбий әсәрләр арқилиқ музакирә қилинған. Бу өткүр мәсилиләрни һәл қилишниң йол хәритилири көрситилгән. Доктор нәбиҗан турсунниң «москва хияллири», язғучи әхтәм өмәрниң «йирақ қирлардин ана юртқа салам» қатарлиқ надир саяһәт хатирилири мана мушу журналда нәшр қилинған иди.

Түнүгүн зияритимизни қобул қилған «шинҗаң аммиви мәдәнийәт сарийи» ниң бир хадими қурбан мамутниң нөвәттә нәдә икәнлики һәққидики соалимизға җавабән дәсләптә униң хели бурунла дәм елишқа чиққанлиқини билдүрди. Биз униңдин қурбан мамутниң нөвәттики әһвалини изчил сориғинимизда униң тутқунда икәнликини дәлиллиди. Биз униңдин қурбан мамутниң кесилип болған яки техи кесилмигәнликини сориғинимизда у делодин бу қәдәр тәпсилий мәлумати йоқлуқини ейтти. Биз бу хадимдин журналист қурбан мамутниң немә сәвәбтин тутқун қилинғанлиқини сориғинимизда у бу һәқтә йәниму илгириләп соал соришимизға болмайдиғанлиқини билдүрүш арқилиқ журналист қурбан мамут делосиниң сәзгүр бир дело икәнликини ашкарилиди.

Пикирләр (0)
Share
Толуқ бәт