"Shinjang medeniyiti" zhurnilining sabiq bash muherriri qurban mamutning tutqunda ikenliki delillendi

Muxbirimiz shöhret hoshur
2020-05-21
Élxet
Pikir
Share
Print
"Ustaz zhurnalist, sha'ir qurban mamutqa ton kiydürüsh murasimi" namliq yighinda (ongdin solgha) yalqun rozi, qurban mamut,we abduqadir jalalidin ependiler. 2013-Yili 15-may,
"Ustaz zhurnalist, sha'ir qurban mamutqa ton kiydürüsh murasimi" namliq yighinda (ongdin solgha) yalqun rozi, qurban mamut,we abduqadir jalalidin ependiler. 2013-Yili 15-may,
ts.cn

Uyghur rayondiki nopuzluq zhurnallardin "Shinjang medeniyiti" zhurnilining sabiq bash muherriri, töhpikar zhurnalist qurban mamut ghayib bolghinigha 3 yil bolup qalghan bolsimu, emma a'ile-tawabi'atliri uning aqi'iwiti heqqide xitay da'iriliridin ta hazirghiche resmiy bir uqturush tapshurup almighan idi.

Muxbirimizning ürümchidiki alaqidar idare-organlargha qarita élip barghan téléfon ziyaretliri dawamida qurban mamutning tutqunda ikenliki sabiq xizmet orni teripidin tunji qétim delillendi.

Sewebsiz tutup ekétish we ekétilgenlikini a'ilisige bildürmeslik we hetta nede tutup turuluwatqanliqini tutqunning özidinmu mexpiy tutush Uyghur rayonida yéqinqi üch yilda dawam qilghan tutqun herikitide köp körülgen bir hadisidur.

Shu sewebtin bolsa kérek, "Shinjang medeniyiti" zhurnilining sabiq bash muherriri qurban mamut 2017‏-yilining axirida ushtumtut ghayib bolup ketkendin kéyin uning amérikadiki oghli behram sintash dadisi heqqide ta hazirghiche resmiy (da'iriler teminligen) bir melumatqa érishelmey kelgen.

Birqanche aydin bériqi éniqlashlirimiz dawamida téléfonimizni qobul qilghan Uyghur aptonom rayonluq medeniyet nazariti qarmiqidiki bezi xadimlar qurban mamutni tonumaydighanliqini bildürse, bezi xadimlar uning ehwalidin xewersizlikini éytqan idi.

Behram sintash Uyghur rayonining yéqinqi 3 yildiki omumiy weziyiti, bolupmu elsöygen dangliq ziyaliylarning qismitige qarap turup dadisining tutqunda ikenlikini perez qilghan. Bolupmu ürümchidiki a'ile-tawabi'ati uninggha dadisi heqqide gep sorimasliqni bezide egitip, bezide ashkara bayan qilghandin kéyin u dadisining tutulup ketkenlikini könglide jezmleshtürgen idi. Ötken ayda téléfonimizni qobul qilghan ürümchi sheherlik medeniyet idarisining xadimi bu heqte medeniyet nazaritidin melumat élishimizni tewsiye qilghan idi.

Töhpikar zhurnalist qurban mamut 1950-yili kucha nahiyesi béhishbagh yéza, bostan kentide tughulghan, 1976-yili. Shinjang uniwérsitétining edebiyat fakultétini püttürgendin kéyin 1984-yilghiche shinjang xelq radiyo istansisida muxbir, muherrir bolup xizmet qilghan. 1985-Yildin 2011-yilghiche "Shinjang medeniyiti" zhurnilida mes'ul muherrir, bash muherrir bolup ishlep, pénsiyege chiqqan.

Bu zhurnalning nopuzi we töhpikar zhurnalistning tesiri behram sintashning dadisi heqqide uchurgha érishishini téximu qiyinlashturghan. U a'ile-tawabi'atining ündidaridiki süretliri we keypiyatigha qarap turup dadisining 2017-yili 11‏-aylarda tutup kétilgenlikini texmin qilghan. Éniqlashlirimiz dawamida bezi alaqidar xadimlar qurban mamut xizmet qilghan "Shinjang medeniyiti" zhurnilining téléfon nomurini teminleshnimu ret qildi.

Behram sintash hazirgha qeder dadisi heqqide uchur élish üchün ijtima'iy taratqularda aktip pa'aliyetlerni qilghan. U "Menmu Uyghur", "Qérindashlirimizdin téxiche uchur yoq" qatarliq heshteg pa'aliyitining bashlamchisi bolghan. Xitay da'iriliri bu heriketke inkas qayturup, bir türküm Uyghur pa'aliyetchilirining ghayib bolghan uruq-tughqanlirini axbarat arqiliq xelq'ara jama'etke körsetken, emma behram sintashning shikayitige jawab bermigen, yeni töhpikar zhurnalist qurban mamut heqqide éghiz achmighan idi. Bu heqte medeniyet nazaritige qarita élip barghan téléfon ziyaretlirimiz izchil jawabsiz qaldurulghan idi.

Zhurnalist qurban mamut bash muherrir mezgilide "Shinjang medeniyiti" zhurnalida Uyghur jem'iyitining eng murekkep we nazuk mesililiri, ilmiy we edebiy eserler arqiliq muzakire qilin'ghan. Bu ötkür mesililerni hel qilishning yol xeritiliri körsitilgen. Doktor nebijan tursunning "Moskwa xiyalliri", yazghuchi extem ömerning "Yiraq qirlardin ana yurtqa salam" qatarliq nadir sayahet xatiriliri mana mushu zhurnalda neshr qilin'ghan idi.

Tünügün ziyaritimizni qobul qilghan "Shinjang ammiwi medeniyet sariyi" ning bir xadimi qurban mamutning nöwette nede ikenliki heqqidiki so'alimizgha jawaben deslepte uning xéli burunla dem élishqa chiqqanliqini bildürdi. Biz uningdin qurban mamutning nöwettiki ehwalini izchil sorighinimizda uning tutqunda ikenlikini delillidi. Biz uningdin qurban mamutning késilip bolghan yaki téxi késilmigenlikini sorighinimizda u délodin bu qeder tepsiliy melumati yoqluqini éytti. Biz bu xadimdin zhurnalist qurban mamutning néme sewebtin tutqun qilin'ghanliqini sorighinimizda u bu heqte yenimu ilgirilep so'al sorishimizgha bolmaydighanliqini bildürüsh arqiliq zhurnalist qurban mamut délosining sezgür bir délo ikenlikini ashkarilidi.

Toluq bet