Атақлиқ нахшичи рәшидә давутниң бир мәһәл лагерда ятқандин кейин кесиветилгәнлики ашкариланди

Мухбиримиз шөһрәт һошур
2020-03-18
Елхәт
Пикир
Share
Принт
Атақлиқ нахшичи рәшидә давут.
Атақлиқ нахшичи рәшидә давут.
Photo: RFA

Вәзийәттин хәвәрдар кишиләрдин бири 3 айниң алдида радийомизға инкас йоллап, атақлиқ нахшичи рәшидә давутниң бир мәзгил лагерда ятқандин кейин, мәхпий сот ечилип кесиветилгәнликини мәлум қилғаниди. Мухбиримизниң шуниңдин буянқи ениқлашлири давамида, рәшидә давутниң үрүмчи шәһәрлик оттура сот мәһкимиси тәрипидин қамақ җазасиға һөкүм қилинғанлиқи дәлилләнди.

Һөрмәтлик радио аңлиғучилар, мана бу лирик нахшиларниң орундиғучиси, һөрмәткә сазавәр нахшичи рәшидә давутниң сәһнидин-әл қойнидин айриветилип лагерға әкетилгәнлики, 2 йилдин буянқи җәмийәт хәвәрлиридә кәң тарқалғаниди. Бирқанчә айниң алдидики бир иҗтимаий ахбарат хәвиридә, униң муддәтсиз қамаққа һөкүм қилинғанлиқи тилға елинған. Йеқинда үрүмчи вәзийитидин хәвәрдар кишиләрдин бири радийомизға учур йоллап, рәшидә давутниң өткән йилниң ахири үрүмчидә ечилған бир мәхпий сотта бөлгүнчилик билән әйибләнгәнлики вә 15 йиллиқ кесиветилгәнликини мәлум қилди. Телефонимизни қобул қилған уйғур аптоном районлуқ нахша-усул өмикиниң бир сабиқ хадими, рәшидә давутниң кесиветилгәнликидин хәвири барлиқи, әмма башқа әһвалидин мәлумати йоқлуқини ейтти.

Вәзийәттин хәвәрдар кишиниң инкасида рәшидә давутниң тутулуши вә кесилишидә униң җәмийәттики тәсири йәни иззәт-һөрмитиниң асаслиқ сәвәб болғанлиқи тәкитләнгән вә лагер тутқунлири арисида уйғур җәмийитидә һәр қайси саһәләрдә баш көтүргән сәркиләрниң муһим бир қисмини тәшкил қилидиғанлиқи әскәртилгән. Инкаста йәнә сот һөкүминиң әдәбият-сәнәт саһәсидики аз бир қисим идарә вә бөлүм башлиқлириға уқтурулғанлиқи баян қилинған. Шуңа биз бу һәқтә учур елиш үчүн үрүмчидики мәдәнийәт вә әдәбият-сәнәт саһәсидики идарә-җәмийәтләргә телефон қилдуқ. Үрүмчидики «биңтүән» ( ишләпчиқириш қурулуш армийәси) нахша-усул вә опера өмикиниң бир мудири, бу өмәктин лагерға әкетилгән сәнәтчиләрниң ким икәнликини сориғинимизда, у бу өмәктә лагерға әкетилгән бирму киши йоқлуқини ейтти. Биз униңдин йеқинда кесиветилгән, идарә вә бөлүм башлиқлириға уқтурулған сәнәткарниң ким икәнликини сориғинимизда униң рәшидә давут икәнликини ашкарилиди. У рәшидә давутниң кесилгәнликини ениқ билидиғанлиқини тәкитләш билән бирликтә, униң кесим муддитидин хәвәрсизлики ейтти. У өзиниң рәшидә давут билән бир өмәктә әмәсликини әскәртип, бу әһвал һәққидә аптоном районлуқ операдин мәлумат елишимизни тәвсийә қилди.

Биз униңдин, рәшидә давутниң кесиветилгәнлики уқтурулған шу йиғинда, сәнәт саһәсидин йәнә кимләрниң барлиқини сориғинимизда, у мәзкур биңтүән сәнәт өмикиниң усул әтритиниң башлиқи майнур дегән аялниң барлиқини ейтти. Усул әтрити башлиқи майнурниң телефони елинмиғандин кейин, биз үрүмчидики алақидар сот орунлириға телефон қилдуқ.

Вәзийәттин хәвәрдар киши рәшидә давут үстидики сот һөкүминиң үрүмчи оттура сот мәһкимиси тәрипидин чиқирилғанлиқини ейтқаниди. Телефонимизни қобул қилған үрүмчидики бир районлуқ сақчи хадими, һөкүмниң үрүмчи шәһәрлик оттура сот тәрипидин чиқирилғанлиқини дәлиллиди. Бу хадим, рәшидә давутниң кесилиш сәвәби һәққидә мәлумат берәлмәйдиғанлиқи, чүнки делониң сиясий бир дело икәнликини әскәртти.

Һөрмәтлик радио аңлиғучилар, һазирғичә болған ениқлашлиримиздин атақлиқ сәнәткар рәшидә давутниң үрүмчи оттура сот мәһкимиси тәрипидин кесиветилгәнлики айдиңлашти, әмма кесилгән йил муддити техи айдиңлашмиди.

Юқиридики аваз улинишидин тәпсилатини аңлиғайсиләр.

Пикирләр (0)
Share
Толуқ бәт