Yawropa parlaménti bérlinda "Saxarof mukapati" toghrisida axbarat élan qilish yighini ötküzdi

2019-12-20
Élxet
Pikir
Share
Print
Jewher ilham yawropa parlaméntining gérmaniyediki merkizide ötküzülgen "Saxarof mukapati" toghrisidiki axbarat élan qilish yighinida. 2019-Yili 20-dékabir. Bérlin, gérmaniye.
Jewher ilham yawropa parlaméntining gérmaniyediki merkizide ötküzülgen "Saxarof mukapati" toghrisidiki axbarat élan qilish yighinida. 2019-Yili 20-dékabir. Bérlin, gérmaniye.
Social Media

20-Dékabir küni yawropa parlaméntining gérmaniyediki merkizi "Saxarof mukapati" toghrisida axbarat élan qilish yighini ötküzdi.

Yawropa parlaménti 18-dékabir fransiyening strasburg shehiridiki merkizide 750 din artuq parlamént ezalirining qatnishishi astida 2019-yilliq "Saxarof mukapati" ni xitay türmisidiki Uyghur öktichi ziyaliysi ilham toxtigha teqdim qilish murasimi ötküzüp, bu mukapatni parlamént re'isi dawid sassoli öz qoli bilen ilham toxtining qizi jewher ilhamgha teqdim qilghan idi. 

Yawropa parlaménti bügün yene gérmaniye paytexti bérlindiki merkizide alahide sorun hazirlap "Saxarof mukapati" toghrisida axbarat élan qilish yighini ötküzgen. Yighin'gha gérmaniye parlaméntining bir qisim ezaliri, xelq'araliq kishilik hoquq teshkilatlirining mes'ulliri qatnashqan sirt, ilham toxtining qizi jewher ilham, d u q re'isi dolqun eysa, "Ilham toxti guruppisi" ning re'isi enwerjan qatarliq Uyghurlarmu qatnashqan. 

Bérlindin alghan melumatlirimizgha qarighanda, jewher ilham 18-dékabir yaropa parlaméntidiki mukapat tarqitish murasimida sözliginidek bügünki bu yighindimu yene bir qétim tesirlik nutuqlar sözlep, yighin ehlining küchlük diqqitini jelp qilghan. 

D u q re'isi dolqun eysa ependining bildürishiche, jewher ilhamning tesirlik nutuqidin kéyin bezi parlamént ezalirimu söz élip, Uyghurlar we jaza lagérliri mesiliside, bolupmu gérmaniyening xitay bilen bolghan iqtisadiy hemkarliq mesilisi toghrisida muhim pikirlerni otturigha qoyghan. 

"Ilham toxti guruppisi" ning re'isi enwerjan ependi jewher ilhamning bügünki nutuqidinmu yene bir qétim qattiq tesirlen'genlikini, "Saxarof mukapati" ning ilham toxti arqiliq Uyghur millitige bérilgen bir mukapat bolghanliqini eskertti.
Melum bolghinidek, 18-dékabir "Saxarof mukapati" ning ilham toxtigha bérilishi xitayni qattiq bi'aram qilishigha qarimay pütün dunyada Uyghurlar mesilisining yene bir qétim küntertipke kélishige türtke bolghan. "Saxarof mukapati" we ilham toxti mesilisi arqiliq nöwettiki Uyghur weziyiti, bolupmu xitayning jaza lagérliri siyasiti hemde bu lagérlarda tutqunda turuwatqan milyonlighan Uyghurlarning ehwali dunya jama'itining yene bir qétim diqqet nezirige ulashqan. Xelq'ara metbu'atlar bu heqte üzüldürmey xewer, maqalilar élan qilmaqta idi. Buninggha ulapla 19-dékabir yawropa parlaménti teripidin qobul qilin'ghan Uyghurlar we jaza lagérlirigha munasiwetlik 20 maddiliq qarar xelq'ara taratqularning bügünki qiziq témisigha aylan'ghan idi. 

Mushundaq bir chaghda yawropa parlaméntining bügün bérlinda alahide yighin tesis qilip, axbarat saheside "Saxarof mukapati" we ilham toxti arqiliq Uyghurlar mesilisini yene bir qétim kötürmekchi bolghini közetküchilerning diqqitini tartqan. 

13-Dékabir gérmaniyediki dangliq putpolchi mes'ut özil ijtima'iy taratquda "Sherqiy türkistan'gha salam" namliq chaqiriqni élan qilghandin tartip yawropa parlaménti tönügün Uyghurlar heqqide qarar qobul qilghuche bolghan bu bir hepte jeryanida gérmaniye metbu'atlirida Uyghurlar mesilise alahide köp we keng teshwiq qilin'ghan bir mesile bolup qaldi.

Toluq bet