Qaghiliqta tépiwélin'ghan 3 balining ata-anisi lagérdin öyige qaytalmighan oqutquchi ikenliki ashkarilandi

Muxbirimiz shöhret hoshur
2019-11-01
Élxet
Pikir
Share
Print
Qaghiliq nahiyilik qatnash saqchiliri tarqatqan, özlirining yolda ézip qalghan 3 balini a'ilisige tapshurup bergenlikini heqqidiki widéyoluq xewer.
Qaghiliq nahiyilik qatnash saqchiliri tarqatqan, özlirining yolda ézip qalghan 3 balini a'ilisige tapshurup bergenlikini heqqidiki widéyoluq xewer.
Social Media

Ötken hepte qaghiliq nahiyilik qatnash saqchiliri bir widéyoluq uqturush tarqitip, özlirining yolda ézip qalghan 3 balini a'ilisige tapshurup bergenlikini xewer qilghan we ata-anilarni perzentlirige yaxshi qarash heqqide agahlandurghan idi. Muxbirimizning bu heqte élip barghan éniqlashliri dawamida bu üch balining ata-anisining qaghiliqtiki bir lagérda oqutquchi ikenliki ashkarilandi. Melum bolushiche, adette her hepte axiri öylirige qaytidighan bu oqutquchilar ötken hepte ruxset bérilmigenlik sewebidin öyige qaytalmighan. Buning bilen mekteptin qaytqan üch balisi kochida qélip, yolda ézip qalghan iken.

Hörmetlik radiyo anglighuchilar, ötken hepte torlarda tarqalghan bir widéyoluq uqturushta qaghiliq nahiye'isidiki qatnash saqchilirining yolda ézip qalghan 3 kichik balini yuqiri sür'etlik yol yaqisidin tépiwalghanliqi we a'ilisige tapshurup bergenliki bayan qilin'ghan. Bu uqturushta yene ahalilerning perzentlirige obdan qarshi tewsiye qilin'ghan idi. Uqturushtiki körünüshte üch kichik balining qorqqinidin yighlighan awazi we saqchilarning yol yaqisidin ularning nerse kéreklirini toplawatqan körünüshi körsitilgen.

Biz weqening arqa körünüshini, yeni 3 balining kochida qélishining sewebini éniqlap béqish üchün qaghiliq nahiysige téléfon qilduq. Weziyettin xewerdar kishilerdin biri bu balilarning dadisining eslide nahiyelik hökümetning xizmetchisi ikenlikini, nöwette bir lagérda oqutquchiliq qilidighanliqini melum qildi. Emma téléfonimizni qobul qilghan qaghiliq nahiyelik hökümettiki xadimlar bu balilarning kimliki we ata-anisila emes, belki mezkur uqturushtinmu xewersizlikini bayan qildi.

Nahiyelik mupettish idarisidiki bir xadimdin yoldin tépiwélin'ghan 3 balining lagérdiki oqutquchi ata-anisining ilgiri mushu idra'ining xizmetchisi yaki emeslikini sorighinimizda u bu idare lagérda ishleydighan birsining yoqluqini bayan qildi. Weziyettin xewerdar kishining bayan qilishiche, bu üch balining ata-anisining lagérda xizmet qilidighanliqi we heptide bir qétimla öyge qaytidighanliqi üchün balilar mekteptin adette hepte ichide chong dadisi we chong anisi teripidin, peqet hepte axiridila ata-na'isi teripidin öyige éélip kélinidiken. Ötken hepte axiri lagérdiki ushtumtut bir xizmet jiddiyliki sewebidin bu balilarning ata-anisi lagérdin ayrilalmighan. Bu ehwaldin xewersiz qalghan balilarning bowa-momisi balilarni alghili mektepke barmighan. Bashlan'ghuch we yeslide oquydighan bu üch bala aditi boyiche 17‏-öktebir küni kechte yesli aldida toplinip, ata-anisining ekitishini kütken. Emma ata-anisi kelmigendin kéyin öylirige özliri méngip qaytishqa mejbur bolghan we yolda ézip qalghan. 

Weziyettin xewerdar kishi bu balilarning dadisining ismining turghun ikenliki we qaghiliqtiki bir lagérda ishleydighanliqi, anisining bolsa bir ahaliler rayonida ishleydighanliqi we nöwette qeshqer shehiridiki bir lagérda oqutquchiliq qiliwatqanliqini bayan qilghan. Téléfonimizni qobul qilghan qaghiliq nahiyelik hökümettiki bir xadim bu uchurlarning toghriliqini delillidi. Nahiyelik mupettish idarisidiki yene bir xadim tépiwélin'ghan 3 balining anisining ismining arzigül ikenliki we bashqa idaride ishleydighanliqini bayan qildi. 
Yene xadimlar we ahaliler teminligen uchurlardin bu balilardin birining qaghiliq bazar ichi 7‏-kent yesliside oquydighanliqi, bu yeslidin 3-4 kilométir uzaqliqta ularning dadisi ishleydighan lagér barliqi, balilarni dadisi alghili kelmigendin kéyin özliri ene shu lagérgha qarap kétiwétip, yoldin ézip ketkenliki melum boldi. 

Hörmetlik radiyo anglighuchilar, ilgiri qeshqerdiki bir lagér saqchisi lagérda yalghuz atalmish oqughuchilarningla emes, belki oqutquchilarningmu nezerbent astida ikenliki, ularning lagér qorosidin xalighan waqitta chiqip kételmeydighanliqini pash qilghan idi.

Toluq bet