Abduqadir jalalidin bilen yalqun rozigha "Sehne hazirlap bergen" korladiki mektep mudiri sherep héyt tutqunda

Muxbirimiz shöhret hoshur
2019-09-24
Élxet
Pikir
Share
Print
Abduqadir jalalidin bilen yalqun rozigha "Sehne hazirlap bergen" liki üchün tutqun qilin'ghan korladiki mektep mudiri sherep héyt (solda).
Abduqadir jalalidin bilen yalqun rozigha "Sehne hazirlap bergen" liki üchün tutqun qilin'ghan korladiki mektep mudiri sherep héyt (solda).
Photo: RFA

Muxbirimizning korlagha qarita élip barghan téléfon ziyaretliri dawamida korla sheherlik ma'arip idarisining sabiq mu'awin bashliqi we 6‏-ottura mektepning mudiri sherep héytningmu tutqunda ikenliki delillendi. Ilgiri radi'omizgha inkas yollighan sherep héytning chet'eldiki ikki oqughuchisi uning bu yilning béshida korlada échilghan 3 derijilik kadirlar yighinida köpchilikning aldida qoligha koyza sélinip élip kétilgenliki we tutulushigha wezipidiki mezgilide ataqliq ziyaliylardin abduqadir jalalidin bilen yalqun rozini korlada léksiye sözleshke dewet qilghanliqining seweb bolghanliqini ilgiri sürgen idi.

Hörmetlik radi'o anglighuchilar, mudir sherep héytning chet'eldiki oqughuchiliridin biri ötken ayda radi'omizgha uchur yollap, mezkur ustazining tutqunda ikenlik xewirini alghanliqi we bu heqtiki tesiratini bayan qilghan idi. Korla sheherlik 6‏-ottura mektepning nöwetchi xadimliridin biri mudir sherep héytni tonumaydighanliqini bayan qilsa, yene biri uning nöwette ish ornida yoq ikenlikini ashkarilidi. Emma u sherep héytning qachandin béri ishqa kelmigenliki heqqidiki so'alimizgha jawab bérelmidi.

Sherep héytning awstraliyediki oqughuchisi rustem tursun özi alaqe qanalliridin igiligenlirige asasen buningdin az dégende 6 ay awwal korlada échilghan bir chong yighinda sherep héytning tutup kétilgenlikini ilgiri sürgen idi. Korla ma'arip idarisining xadimlirimu sabiq mu'awin mudir sherep héytni tonumasqa séliwalghandin kéyin, biz bayin'gholin oblastliq axbarat idarisidin melumat soriduq. Bu idare xadimi sherep héytning tutulush délosi heqqide özining melumat bérish hoquqi yoqluqini tilgha aldi. Emma sherep héytning kimliki we tutulghanliq uchurini inkar qilmidi.  
Sherep héytning yaponiyede oquwatqan oqughuchisi emrulla dawut ustazi sherep héytning özide qaldurghan tesiratlirini bayan qilip ötti. Uning déyishiche, sherep héytning küchlük milliy ghururi we durus exlaqi uning tutulushigha seweb bolghan. Rustem tursunning bayan qilishiche, sherep héyt ma'arip idariside emel tutqan mezgilide ataqliq ziyaliylardin abduqadir jalalidin bilen yalqun rozini korlagha birqanche qétim léksiyege teklip qilghanliqi üchün "Milliy bölgünchilerge sehne hazirlap bérish" bilen eyiblinip, tutqun qilin'ghan. Korladiki saqchi xadimliridin biri sherep héytning nöwette korla échiwétish rayonidiki yighiwélish lagérida ikenlikini ashkarilidi. Sherep héytning tutulghanliqigha bir yil bop qalghanliqini bayan qilghan bu xadim uning abduqadir jalalidin bilen yalqun rozini korlada léksiyege teklip qilghanliqi üchün tutulghanliq uchurining toghriliqini delillidi.

Toluq bet