Шөһрәт ғени: лагерға соланған ата-анамниң гунаһи америка визиси алғанлиқи

Мухбиримиз меһрибан
2019-07-11
Елхәт
Пикир
Share
Принт
«Қайта тәрбийәләш» намидики «йиғивелиш лагери» ниң тәмидики сим тикән соруқ вә көзитиш нуқтиси. 2018-Йили 4-сентәбир, даванчиң.
«Қайта тәрбийәләш» намидики «йиғивелиш лагери» ниң тәмидики сим тикән соруқ вә көзитиш нуқтиси. 2018-Йили 4-сентәбир, даванчиң.
REUTERS

Үрүмчидики тиҗарәтчи ғени һошур әпәнди вә аяли рәйһансәм абла ханимлар 2017-йили 5-айда бейҗиңға берип, америкида магистирлиқта оқуватқан оғли шөһрәтниң оқуш пүттүрүш мурасимиға қатнишиш үчүн виза алған. Әмма бу ата-аниларниң америкида оқуватқан оғлиниң мәктәп пүттүрүш мурасимиға қатнишиш үчүн америка әлчиханисидин алған визиси уларниң шу йили 9-айда үрүмчидики «қайта тәрбийәләш» намидики «йиғивелиш лагери» ға қамилишидики җинайи пакитқа айланған. Икки йилдин буян хитай һөкүмитигә үмид бағлап, ата-анисиниң лагердин қоюп берилишини зариқип күткән шөһрәт ғени һошур әпәнди, 2019-йили 5-айда сүкүтни бузған. У ата-анисиниң из-дерикини қилишқа, америка таратқулирида лагерға қамалған ата анисиниң әһвалини аңлитишқа башлиған. Шөһрәт ғени һошур әпәнди бүгүн радийомиз уйғур бөлүминиң зияритини қобул қилип, «лагерға соланған ата-анисиниң бирдин-бир гунаһи америка визиси алғанлиқи, хитайчә оқуған алий мәлуматлиқ ата-анисиниң аталмиш‹қайта тәрбийәләш' кә еһтияҗи йоқ» лиқини билдүрди. Диққитиңлар мухбиримиз меһрибанниң шөһрәт ғени һошур әпәнди билән өткүзгән сөһбитидә болсун.

Нөвәттә америкиниң чикаго шәһиридә туруватқан шөһрәт ғени һошур әпәнди радийомиз зияритини қобул қилип, өзиниң оқуш пүттүрүш мурасимиға қатнишиш үчүн, 2017-йили америкиға виза алған ата-анисиниң хитайниң лагериға қамалғанлиқи һәққидики әһвални икки йилдин кейин ашкарилаш қарариға кәлгәнлики вә ата-анисиниң әркинликкә чиқиши үчүн өз қолидин келидиған барлиқ тиришчанлиқларни көрситиватқанлиқини билдүрди.

Шөһрәт ғени әпәндиниң билдүрүшичә, у 2015-йили америкиниң чикаго шәһиридики иллиной тәбиий пәнләр университетиға толуқ курс 3-йиллиқидин башлап бакалаврлиқ оқуши үчүн кәлгән. Нәтиҗиси алаһидә яхши болғини үчүн бир йилдин кейин бакалаврлиқ оқушини тамамлап, ашу мәктәпниң өзидә магистирлиқ үчүн оқушқа қобул қилинған. Әмма шөһрәт ғени, өзиниң оқуш пүттүрүш мурасимиға ға қатнишиш үчүн америкиға келишкә тәклип қилған ата-аниси лагерға қамалғанлиқи үчүн, у 2018-йили 5-айдики магистирлиқ оқушини пүттүрүш мурасимини ата-анисиниң тәбрикисиз ялғуз өткүзиду.

Шөһрәт ғени әпәндиниң билдүрүшичә, у 2017-йили магистирлиқ оқушини пүттүрүш мурасимидин бир йил илгирила ата-анисиға тәклип қәғизи әвәткәнлики үчүн, ата-аниси шу йили 5-айда америкиға келиш визисини алиду. Әмма улар шу вақитта техи америкиға кәлмигән болуп, шөһрәт ғени 2017-йили 9-айниң 20-күни анисиниң туғулған күнини тәбрикләш үчүн телефон қилғанда, ата-аниси билән сөзлишәлмигәндин кейин, сүрүштүрүш арқилиқ уларниң лагерға қамалғанлиқидин хәвәр тапиду.

Шөһрәт ғени әпәндиниң қаришичә, алий мәктәп тәрбийәси көргән юқири мәлуматлиқ ата-анисиниң аталмиш «қайта тәрбийәлиниш» кә һечқандақ еһтияҗи йоқ. Болупму хитайчә оқуған дадиси хитайлар билән һәмкарлишип тиҗарәт қилидиған киши. Илгири австралийә, җәнубий корейә қатарлиқ дөләтләрдә бирқанчә қетим зиярәттә болған ата-анисини даириләрниң «қайта тәрбийәләш» дегәндәк намларда лагерға қамиши әмәлийәттә һечқандақ кишини қайил қилалмайдиған орунсиз баһанә. Униң ейтишичә, шуңа даириләрниң униң ата-анисини лагерға қамилишиға уларниң америкида оқуватқан оғлини йоқлаш үчүн виза алғанлиқи «аталмиш гунаһи» болған болуши мумкин.

Шөһрәт ғени әпәнди йәнә өзиниң бу йил 5-ай мәзгилидә икки йиллиқ сүкүтни бузуп, үрүмчидики сақчи даирилиридин ата-анисини сүрүштүргәндә хитай сақчилириниң алдаш вә тәһдитлиригә учриғанлиқи, америкиниң «дәвр» журнили қатарлиқ таратқулириниң зияритини қобул қилип, ата-анисиниң әһвалини аңлатқанлиқи, шундақла ата-анисиниң әһвалини сүрүштүрүштә ярдими болиду дәп қариған иҗтимаий тәшкилатлар вә бирләшкән дөләтләр тәшкилати қармиқидики мунасивәтлик ишханиларға хәт йезип, ата-анисиниң мәсилисини давамлиқ аңлитиватқанлиқини билдүрди.

Юқириқи аваз улинишидин сөһбәтниң тәпсилатини аңлайсиләр.

Пикирләр (0)
Share
Толуқ бәт