Уйғур аилилири һәптиләп «чақирилмиған меһманлар» ни күтүшкә мәҗбур болмақта

Мухбиримиз гүлчеһрә
2017-12-18
Елхәт
Пикир
Share
Принт
Хитайниң иҗтимаий таратқулиридин бири болған үндидар торбетигә чиқирилған «туғқанлишиш һәптилики» тәшвиқати. 2017-Йили 15-декабир.
Хитайниң иҗтимаий таратқулиридин бири болған үндидар торбетигә чиқирилған «туғқанлишиш һәптилики» тәшвиқати. 2017-Йили 15-декабир.
Social Media

Уйғур елидин тарқитидиған, «шинҗаң гезити» 18-декабир санидики «аптоном районниң милләтләр иттипақлиқи - ‹туғқанлишиш һәптилики' паалийитиниң бир һәптиликигә нәзәр» темилиқ хәвиридин мәлум болушичә, аптоном районлуқ партком сиясий-қанун комитети, аптоном районлуқ партком тәшкилат бөлүминиң тунҗи түркүмдики 31 кадир, ишчи-хизмәтчиси 12-айниң 9-күни чүштә йүк-тақ, турмуш лазимәтликлири, шундақла партийә 19-қурултийиниң роһини өгиниш материяллири вә әлрайи күндилик хатирисини елип, қәшқәр йеңишәһәр наһийәсиниң арал йезиси һәм йеңиават йезисиға чүшкән. Улар туғқанлашқан деһқанларниң өйлиригә орунлишип, деһқанларниң өйидә тамақ йәп, қонуп, деһқанчилиқ ишлирини қилишип, милләтләр иттипақлиқи «туғқанлишиш һәптилики» паалийити елип барған.

Хәвәрдә ишчилар уюшмисиниң рәиси дүән вейҗяңниң «амма арисиға чоңқур чөккәндила, һәқиқий әһвални билгили болиду» дегән сөзини нәқил елинған болуп, у йәнә «амма билән бир қазанниң тамиқини йәп, һойла-арамлирини тазилап, етизға берип биллә ишләп, амминиң турмушиға толуқ сиңип, амма ойлиғанни ойлиғандила, амма учриған қийинчилиқларни тоғра һәл қилғили болиду» дегән.

Уйғур елидики таратқуларниң мунасивәтлик хәвәрлиригә қариғанда, аптоном районлуқ парткомниң 12-айда, «туғқанлишиш һәптилики» паалийитини орунлаштуруши билән аптоном районлуқ партком тәшкилат бөлүминиң рәһбәрлири 12 -айниң 8-күни чүштин кейин «туғқанлишиш һәптилики» паалийитигә қатнишидиған биринчи түркүмдики кадирлар, ишчи-хизмәтчиләрни башлап, учтурпан наһийәсигә қарап йолға чиққан. Нөвәттә 2-3-түркүмдики кадирлар, чамаданлирини, орун көрпилирини биллә елип асасий қатламлардики аталмиш «туғқанлашқан» аилиләргә көчүп киришкә башлиған.

Даириләрниң асасий қатламдики һәр бир уйғур деһқан аилисигә қанчидин кадир орунлаштурғанлиқи вә уларниң аилиләрдә қанчә күн туридиғанлиқи немиләрни қилидиғанлиқи һәққидә йәниму тәпсилий мәлуматлар елиш үчүн бир қисим йеза-кәнт тармақлириға телефон қилдуқ. Пәқәт хотән лоп наһийәси бағчә йезилиқ һөкүмәт ишханисиға телефон уланди.

Телефонни бир хитай кадир елип, бу җайға үрүмчидин йетип кәлгән кадирларниң башламчилиқида «туғқанлишиш һәптилики» паалийитиниң давамлишиватқанлиқини билдүргән болсиму, башқа тәпсилий әһваллардин мәлумат берәлмәйдиғанлиқини ейтип телефонни қоювәтти.

Уйғур аптоном районлуқ сиясий-қанун комитетиниң секретари җу хәйлүнниң 8-декабир «туғқанлишиш һәптилики» сәпәрвәрлик йиғинида ейтқан сөзлиригә қариғанда, бу нөвәт асасий қатламға «туғқанлишиш һәптилики» кә чүшкән кадирларниң асаслиқ вәзиписи аилиләрни һөддигә елип, өйму-өй һәр бир аилигичә әһвал игиләп, партийә 19-қурултийиниң роһини йәткүзүш, ши җинпиңниң «шинҗаңни идарә қилиш тәдбири» ни, болупму «иҗтимаий муқимлиқ вә әбәдий әминлик нишанини әмәлийләштүрүш» икән.

У йиғинда йәнә мәзкур орунлаштурушниң кадир, ишчи хизмәтчиләр үчүн мәҗбурий орунлаштурулған вәзипә икәнлики ипадә қилип, «һәр бир кадир, ишчи-хизмәтчи орунлаштурушқа бинаән, алдин яхши тәйярлиқ қилиши керәк, һәрқандақ адәмниң һәрқандақ сәвәб, һәр қандақ баһанә билән мәсулийәттин өзини қачуруп, ‹туғқанлишиш һәптилики' паалийитигә қатнишишни рәт қилишиға қәтий йол қоюлмайду.» Дәп тәкитлигән.

Уйғур аптоном районлуқ парткомниң «шинҗаң гезити» дә 12-декабир елан қилинған бу тоғрилиқ көрсәтмисидә, «һәр дәриҗилик җайлар, тармақлар, орунлардики барлиқ кадир, ишчи-хизмәтчиләр рәһбирий кадирларниң башламчилиқида түркүмләргә бөлүнүп, асасий қатламдики туғқанлашқан аилиләрниң өйидә туриду, амма немә йесә кадирлар шуни йәйду, һәр күни аммиға тамақ пули тапшуриду, бир һәптә қанат яйдуридиған амма билән биллә ғизалиниш, биллә туруш, биллә әмгәк қилиш, биллә өгиниш паалийити һәр милләт кадирлар билән амминиң алақилишиши, алмаштуруши, арилишишини чоңқурлаштуруп, милләтләр иттипақлиқи, иҗтимаий муқимлиқ чоң яхши вәзийитини мустәһкәмләп вә раваҗландуруп, шинҗаңниң иҗтимаий муқимлиқи вә әбәдий әминликниң пухта асасини техиму мустәһкәмләйду» дәп көрсәткән.

Биз бу һәқтә аилиләрдинму әһвал игиләшкә тириштуқ. Ақсудики бир уйғур аял, өзиниң орган кадири болуп ишләватқан 20 яшлардики ялғуз қизиниңму хотәнгә «туғқанлишиш һәптилики» гә чүшүрүлгәнликини ейтти. У йәнә қизи кәткәндин кейин өзиниңму турмушта қийнилип қалғанлиқини билдүрди. Қизиниң телефонда дейишичә, 4 кадир бир өйдә туридикән. Шу өйдә қонуп, йәп-ичип хизмәт қилидикән. Бу аял өзиниң өйигиму үрүмчидин кадирлар кәлгәнликини, өйи бир еғиз ятақлиқ өй болғачқа улар қонувалмисиму күндә кирип әһвал игиләп чиқип кетип барғанлиқини, уни буни сорап рәсим чүшкәндин башқа бир иш қилмиғанлиқини, өзиниң бу әһваллардин биарам болуватқанлиқини, бу паалийәтниң тезрәк аяғлишишини күтүватқанлиқини билдүрди.

Хитай һөкүмитиниң аталмиш «туғқанлишиш һәптилики» гә даир учур мәлуматлар нөвәттә чәтәлләрдики иҗтимаий таратқулардики қизиқ нуқтиларниң бири болмақта. Уйғур вәзийитини көзәткғүчиләрдин, америка уйғур бирләшмисиниң рәиси илшат һәсән әпәнди даириләрниң хитайниң аталмиш туғқан йоқлаш һәптиликини мушу күнләрдә елип беришиниң, хитайниң чағинини хатирҗәм өткүзүшни мәқсәт қилған тәдбириниң бири дәп чүшинидиғанлиқини билдүрүп: «әмма милләтләр иттипақлиқини яхшилаш намида елип бериватқан, күтүлмигән меһманларни деһқанларниң аилисигә мәҗбурий киргүзүп һәптиләп турғузуш, кишиләрниң шәхсийитигә, өрп-адитигә еғир һөрмәтсизлик қилғанлиқ. Бу хитай өзиниң қануниғиму, инсаний әхлаққиму, мәнтиқиғиму уйғун әмәс, таҗавузчилиқ сияситидин башқа нәрсә әмәс. Бу ашқун тәдбирләр әксичә бизарлиқ, һәтта техиму чоңқур нәпрәт вә дүшмәнликкә сәвәб болиду» дәп мулаһизә қилди.

Даириләр һәтта аилиләргә әвәткән бу кадирларға вәзипини орунлаш тәдбирлири вә көрсәтмилириниму бәлгиләп тарқитип бәргән болуп, аптоном районлуқ парткомниң үндидар суписида «туғқанлишиш һәптилики» паалийитини қанат яйдурушта, «бирләшмә көңүл ечиш паалийәтләр арқилиқ арилиқни йеқинлаштурушқа һәм түрткә болуп, барди-кәлди қилиш, муңдишиш, сирдишиш җәрянида чүшинишни чоңқурлаштуруп, һессиятни күчәйтип, һәр милләт амма милләтләр иттипақлиқини техиму қәдирләйдиған чоң яхши вәзийәтни барлиққа кәлтүрүш керәк.» Дегәнләр көрситилгән.

Пикирләр (0)
Share
Толуқ бәт