Uyghur a'ililiri heptilep "Chaqirilmighan méhmanlar" ni kütüshke mejbur bolmaqta

Muxbirimiz gülchéhre
2017-12-18
Élxet
Pikir
Share
Print
Xitayning ijtima'iy taratquliridin biri bolghan ündidar torbétige chiqirilghan "Tughqanlishish heptiliki" teshwiqati. 2017-Yili 15-dékabir.
Xitayning ijtima'iy taratquliridin biri bolghan ündidar torbétige chiqirilghan "Tughqanlishish heptiliki" teshwiqati. 2017-Yili 15-dékabir.
Social Media

Uyghur élidin tarqitidighan, "Shinjang géziti" 18-dékabir sanidiki "Aptonom rayonning milletler ittipaqliqi - 'tughqanlishish heptiliki' pa'aliyitining bir heptilikige nezer" témiliq xewiridin melum bolushiche, aptonom rayonluq partkom siyasiy-qanun komitéti, aptonom rayonluq partkom teshkilat bölümining tunji türkümdiki 31 kadir, ishchi-xizmetchisi 12-ayning 9-küni chüshte yük-taq, turmush lazimetlikliri, shundaqla partiye 19-qurultiyining rohini öginish matériyalliri we elrayi kündilik xatirisini élip, qeshqer yéngisheher nahiyesining aral yézisi hem yéngi'awat yézisigha chüshken. Ular tughqanlashqan déhqanlarning öylirige orunliship, déhqanlarning öyide tamaq yep, qonup, déhqanchiliq ishlirini qiliship, milletler ittipaqliqi "Tughqanlishish heptiliki" pa'aliyiti élip barghan.

Xewerde ishchilar uyushmisining re'isi düen wéyjyangning "Amma arisigha chongqur chökkendila, heqiqiy ehwalni bilgili bolidu" dégen sözini neqil élin'ghan bolup, u yene "Amma bilen bir qazanning tamiqini yep, hoyla-aramlirini tazilap, étizgha bérip bille ishlep, ammining turmushigha toluq singip, amma oylighanni oylighandila, amma uchrighan qiyinchiliqlarni toghra hel qilghili bolidu" dégen.

Uyghur élidiki taratqularning munasiwetlik xewerlirige qarighanda, aptonom rayonluq partkomning 12-ayda, "Tughqanlishish heptiliki" pa'aliyitini orunlashturushi bilen aptonom rayonluq partkom teshkilat bölümining rehberliri 12 -ayning 8-küni chüshtin kéyin "Tughqanlishish heptiliki" pa'aliyitige qatnishidighan birinchi türkümdiki kadirlar, ishchi-xizmetchilerni bashlap, uchturpan nahiyesige qarap yolgha chiqqan. Nöwette 2-3-türkümdiki kadirlar, chamadanlirini, orun körpilirini bille élip asasiy qatlamlardiki atalmish "Tughqanlashqan" a'ililerge köchüp kirishke bashlighan.

Da'irilerning asasiy qatlamdiki her bir Uyghur déhqan a'ilisige qanchidin kadir orunlashturghanliqi we ularning a'ililerde qanche kün turidighanliqi némilerni qilidighanliqi heqqide yenimu tepsiliy melumatlar élish üchün bir qisim yéza-kent tarmaqlirigha téléfon qilduq. Peqet xoten lop nahiyesi baghche yéziliq hökümet ishxanisigha téléfon ulandi.

Téléfonni bir xitay kadir élip, bu jaygha ürümchidin yétip kelgen kadirlarning bashlamchiliqida "Tughqanlishish heptiliki" pa'aliyitining dawamlishiwatqanliqini bildürgen bolsimu, bashqa tepsiliy ehwallardin melumat bérelmeydighanliqini éytip téléfonni qoyuwetti.

Uyghur aptonom rayonluq siyasiy-qanun komitétining sékrétari ju xeylünning 8-dékabir "Tughqanlishish heptiliki" seperwerlik yighinida éytqan sözlirige qarighanda, bu nöwet asasiy qatlamgha "Tughqanlishish heptiliki" ke chüshken kadirlarning asasliq wezipisi a'ililerni höddige élip, öymu-öy her bir a'iligiche ehwal igilep, partiye 19-qurultiyining rohini yetküzüsh, shi jinpingning "Shinjangni idare qilish tedbiri" ni, bolupmu "Ijtima'iy muqimliq we ebediy eminlik nishanini emeliyleshtürüsh" iken.

U yighinda yene mezkur orunlashturushning kadir, ishchi xizmetchiler üchün mejburiy orunlashturulghan wezipe ikenliki ipade qilip, "Her bir kadir, ishchi-xizmetchi orunlashturushqa bina'en, aldin yaxshi teyyarliq qilishi kérek, herqandaq ademning herqandaq seweb, her qandaq bahane bilen mes'uliyettin özini qachurup, 'tughqanlishish heptiliki' pa'aliyitige qatnishishni ret qilishigha qet'iy yol qoyulmaydu." dep tekitligen.

Uyghur aptonom rayonluq partkomning "Shinjang géziti" de 12-dékabir élan qilin'ghan bu toghriliq körsetmiside, "Her derijilik jaylar, tarmaqlar, orunlardiki barliq kadir, ishchi-xizmetchiler rehbiriy kadirlarning bashlamchiliqida türkümlerge bölünüp, asasiy qatlamdiki tughqanlashqan a'ililerning öyide turidu, amma néme yése kadirlar shuni yeydu, her küni ammigha tamaq puli tapshuridu, bir hepte qanat yayduridighan amma bilen bille ghizalinish, bille turush, bille emgek qilish, bille öginish pa'aliyiti her millet kadirlar bilen ammining alaqilishishi, almashturushi, arilishishini chongqurlashturup, milletler ittipaqliqi, ijtima'iy muqimliq chong yaxshi weziyitini mustehkemlep we rawajlandurup, shinjangning ijtima'iy muqimliqi we ebediy eminlikning puxta asasini téximu mustehkemleydu" dep körsetken.

Biz bu heqte a'ililerdinmu ehwal igileshke tirishtuq. Aqsudiki bir Uyghur ayal, özining organ kadiri bolup ishlewatqan 20 yashlardiki yalghuz qiziningmu xoten'ge "Tughqanlishish heptiliki" ge chüshürülgenlikini éytti. U yene qizi ketkendin kéyin öziningmu turmushta qiynilip qalghanliqini bildürdi. Qizining téléfonda déyishiche, 4 kadir bir öyde turidiken. Shu öyde qonup, yep-ichip xizmet qilidiken. Bu ayal özining öyigimu ürümchidin kadirlar kelgenlikini, öyi bir éghiz yataqliq öy bolghachqa ular qonuwalmisimu künde kirip ehwal igilep chiqip kétip barghanliqini, uni buni sorap resim chüshkendin bashqa bir ish qilmighanliqini, özining bu ehwallardin bi'aram boluwatqanliqini, bu pa'aliyetning tézrek ayaghlishishini kütüwatqanliqini bildürdi.

Xitay hökümitining atalmish "Tughqanlishish heptiliki" ge da'ir uchur melumatlar nöwette chet'ellerdiki ijtima'iy taratqulardiki qiziq nuqtilarning biri bolmaqta. Uyghur weziyitini közetkghüchilerdin, amérika Uyghur birleshmisining re'isi ilshat hesen ependi da'irilerning xitayning atalmish tughqan yoqlash heptilikini mushu künlerde élip bérishining, xitayning chaghinini xatirjem ötküzüshni meqset qilghan tedbirining biri dep chüshinidighanliqini bildürüp: "Emma milletler ittipaqliqini yaxshilash namida élip bériwatqan, kütülmigen méhmanlarni déhqanlarning a'ilisige mejburiy kirgüzüp heptilep turghuzush, kishilerning shexsiyitige, örp-aditige éghir hörmetsizlik qilghanliq. Bu xitay özining qanunighimu, insaniy exlaqqimu, mentiqighimu uyghun emes, tajawuzchiliq siyasitidin bashqa nerse emes. Bu ashqun tedbirler eksiche bizarliq, hetta téximu chongqur nepret we düshmenlikke seweb bolidu" dep mulahize qildi.

Da'iriler hetta a'ililerge ewetken bu kadirlargha wezipini orunlash tedbirliri we körsetmilirinimu belgilep tarqitip bergen bolup, aptonom rayonluq partkomning ündidar supisida "Tughqanlishish heptiliki" pa'aliyitini qanat yaydurushta, "Birleshme köngül échish pa'aliyetler arqiliq ariliqni yéqinlashturushqa hem türtke bolup, bardi-keldi qilish, mungdishish, sirdishish jeryanida chüshinishni chongqurlashturup, héssiyatni kücheytip, her millet amma milletler ittipaqliqini téximu qedirleydighan chong yaxshi weziyetni barliqqa keltürüsh kérek." dégenler körsitilgen.

Toluq bet