Уйғур паалийәтчиләр райондики һөкүмәт кадирлириға зәрбә бериш һәрикитигә инкас қайтурди

Мухбиримиз меһрибан
2017-02-13
Елхәт
Пикир
Share
Принт
 Сақаллиқ бир бувайни  уруватқан кадир қурбан
Сақаллиқ бир бувайни уруватқан кадир қурбан
RFA/Arslan

Хитай таратқулириниң хәвәр қилишичә, 2016-йили уйғур дияридики тәптиш органлири 800 дин артуқ һөкүмәт кадириниң интизамға хилаплиқ қилиш делосини тәкшүрүп бир тәрәп қилған. Мәзкур хәвәр чәтәлләрдики уйғур тәшкилатлири вә паалийәтчиләрниң җиддий диққитини қозғиди. Дуня уйғур қурултийиниң баш катипи долқун әйса вә башқа уйғур паалийәтчиләрниң қаришичә, даириләрниң давамлаштуруватқан қаттиқ қол сиясити вә бу сиясәтни иҗра қилиш җәрянида бир түркүм һөкүмәт әмәлдарлирини җазалашқа башлиғанлиқи, даириләрниң чәтәлләрдики демократ һөкүмәтләрниң тәнқидлишигә учраватқан миллий бастуруш сияситиниң кризис ичидә қалғанлиқиниң вә райондики муқимлиқ вә мәңгүлүк әминликни сақлишиниң тәскә чүшүватқанлиқиниң ипадиси дейишкә болидикән.

Хитай хәлқ ториниң 13-февралдики хәвиридә 11-феврал күни уйғур аптоном район даирилириниң 2016-йиллиқ тәптиш хизмити хуласә йиғини ачқанлиқи, йиғинда бултур бир йил ичидә 800 дин артуқ һөкүмәт кадириниң қануний җавабкарлиққа тартилғанлиқи елан қилинди. Хәвәрдә тилға елинған қануний җавабкарлиққа тартилған кадирларниң җинайи қилмишлири вә 2017-йилидики хизмәт нишанида районниң муқимлиқи вә әбәдий әминликигә капаләтлик қилиш тәкитлинип, өзиниң хизмәт мәсулийитини ада қилмиған һөкүмәт кадирлириниң қаттиқ бир тәрәп қилинидиғанлиқиниң тәкитлиниши диққәт қозғиди.

Хәвәрдин мәлум болушичә, йиғинда 2016 йили пүткүл район тәвәсидә интизамға хилаплиқ қилиш билән тәкшүрүлүп дело турғузулған һөкүмәт хизмәтчилири сани 835 нәпәр дәп елан қилинған. Булардин пара елиш, хиянәт қилиш билән әйибләнгән кадирлар 687,хизмәттә мәсулийәтсизлик қилиш җинайити артилған кадирлар 148 нәпәр дәп елан қилинип, тәптиш органлири уларни, үстидин тәкшүрүш елип берип дело турғузғандин кейин, сотниң бир тәрәп қилишиға тапшурған. Мәзкур хәвәрдә йәнә, йиғинда тәптиш органлириниң 2017-йилдики вәзиписи һәққидә тохтилип, «уйғур аптоном районидики иҗтимаий муқимлиқ вә әбәдий әминлик баш нишанини чөридәп, зораванлиқ, террорлуқ җинайәтлирини қанун бойичә қаттиқ җазалап, назарәт қилиш вә тәкшүрүшни күчәйтиш» тәкитләнгәнлики баян қилинған.

Дуня уйғур қурултийи баш катипи долқун әйса әпәнди вә америка уйғур бирлики рәиси елшат һәсән әпәндиләр радийомиз зияритини қобул қилип, даириләрниң йеқиндин буян йүргүзүватқан сияситигә вә район вәзийитидики өзгиришләргә йеқиндин диққәт қилип келиватқанлиқини билдүрди.

Дуня уйғур қурултийи рәиси долқун әйса әпәнди, даириләрниң йеқиндин буян муқимлиқни тәкитләп, қаттиқ бастурушни күчәйткәнлики вә өз сияситини иҗра қиливатқан һөкүмәт кадирлириниң, болупму уйғур қатарлиқ йәрлик милләтләрдин болған һөкүмәт кадирлириниң садақитини синаватқанлиқини билдүрүп, бу арқилиқ даириләрниң райондики һөкүмранлиқини техиму мустәһкәмләшкә урунуватқанлиқини тәкитлиди.

Долқун әйса әпәнди баянида, даириләрниң нөвәттә һәрикәт түсини алған бу хил зәрбә бериш долқуни қозғиши, уйғур аптоном район даирилириниң җавабкарлиқни вәзипә иҗра қиливатқан һөкүмәт кадирлириға артип, уларни җазалаш арқилиқ хитай мәркизи һөкүмити алдидики җавабкарлиқтин, хәлқараниң тәнқидлишидин қутулуш йолини издәп, йәрлик хәлқниң наразилиқини пәсәйтишкә урунуватқанлиқини билдүрди.

Америка уйғур бирликиниң рәиси елшат һәсән әпәнди әпәнди, өткән һәптә үрүмчидә ечилған 2016-йиллиқ тәптиш органлири хизмәт хуласә йиғини һәққидики хәвәр вә униңдин башқа бирнәччә айдин буян елан қилиниватқан һөкүмәт кадирлириниң җазалиниватқанлиқи һәққидики хәвәрләргә йеқиндин диққәт қиливатқанлиқини билдүрди.

Елшат әпәнди даириләр 10-феврал җүмә күни елан қилған һөкүмәт хәвиридики җазаланған 7 нәпәр уйғур кадирни нәқил елип, хитай һөкүмәт даирилириниң уйғур кадирларни җазалашта һәр вақит уларға «хизмәттә мәсулийитини ада қилмаслиқ, вәзипә иҗра қилишта мәсулийитини ада қилмаслиқ, бипәрвалиқ қилиш, диний радикаллиқ вә миллий бөлгүнчилик һәрикәтлиригә зәрбә бериштә ирадиси мустәһкәм болмаслиқ, икки йүзлимилик қилиш» қатарлиқ җинайәтләрни артиши, әмәлийәттә хитай даирилириниң уйғур қатарлиқ хитай болмиған йәрлик кадирларға ишәнмәслик позитсийисиниң ашкара ипадилиниши вә районда мустәмликә сиясити йүргүзүватқанлиқиниң пакити икәнликини билдүрди.

Елшат һәсән әпәнди даириләрниң райондики һөкүмәт кадирлириға қарита бу хил һәрикәт түсини алған омумйүзлүк тәкшүрүш, зәрбә бериш вә вә җазалаш һәрикити йүргүзүшидики мәқсити һәққидә тохтилип, йеңи әмәлдар чен чүәнгониң вәзипигә олтурғандин кейин бир тәрәптин өзигә садиқ бир түркүм һөкүмәт кадирлирини әтрапиға топлаш билән биллә, хитай һөкүмәт даирилириниң районда йүргүзүватқан қаттиқ қоллуқ бастуруш сияситиниң мәғлубийитидики җавабкарлиқни бир түркүм һөкүмәт әмәлдарлириға артиш, уларни җазалаш арқилиқ йүз бериш еһтимали болған техиму зор қаршилиқ һәрикәтлириниң алдини елишқа урунуватқанлиқини, әмма даириләр уйғурларға қаратқан миллий бастуруш сияситини өзгәртмигүчә районда өзлири арзу қилған мәңгүлүк әминликкә йетәлмәйдиғанлиқини билдүрди.

Пикирләр (0)
Share
Толуқ бәт