Da'iriler altay, chöcheklerdiki shi'iwrghanliq qar apiti heqqide bir tereplime xewer berdi

Muxbirimiz méhriban
2016-11-25
Élxet
Pikir
Share
Print
Süret, 2010 - yili 17 yanwar küni, uyghur élining shimalidiki chingxé dégen yerdiki charwichilar soghuqta tonglap ölgen qoylarni bir terep qiliwatqan körünüsh.
Süret, 2010 - yili 17 yanwar küni, uyghur élining shimalidiki chingxé dégen yerdiki charwichilar soghuqta tonglap ölgen qoylarni bir terep qiliwatqan körünüsh.
AFP Photo

Xitay taratqulirida bu yil 10-noyabirdin 25-noyabirghiche Uyghur diyarining gherbiy shimalidiki altay, chöchek, ili rayonlirida 15 kün dawamlashqan shiwirghanliq qar bezi jaylarning qatnishini üzüp qoyghanliqini xewer qildi. Emma shiwirghanliq qarning rayondiki xelqqe élip kelgen iqtisadiy ziyanliri heqqide resmiy statistikiliq melumat bermidi. Altay,chöchek qatarliq jaylardin ziyaritimizni qobul qilghan yerlik xelq bu yilqi qishning shiwirghanliq qar bilen bashlinishi, rayondiki qatnashqa qolaysizliq élip kelgendin bashqa, téximu muhimi déhqan, charwichilargha éghir iqtisadiy ziyan élip kélishi mumkinlikini bildürdi.

Xitayning junggo xewerler torining 25-noyabirdiki xewiride, hökümet da'irilirining ikki heptidin buyan altay, chöchek we ili rayonlirida dawamlishiwatqan qar-shiwirghanliq hawa kélimatigha qarita jiddiy tedbir éliwatqanliqi we bu rayonlarda qatnaydighan yük aptomobilliri we yoluchilarning bixeterlikige diqqet qilishqa chaqirghanliqi xewer qilindi.

Oxshash mezmundiki xewerler Uyghur rayoni hökümet da'irilirining bashqa taratquliridimu bériliwatqan bolup, bu heqtiki xewerlerde bu yil qish peslide baldur bashlan'ghan qar-shiwirghanliq hawa rayi kélimatining tengritéghining shimalidiki tashyol, tömüryol qatnishigha éghir tosqunluq élip kelgenliki tilgha élindi.

Emma, Uyghur rayonidiki hökömet taratqulirining rayonda dawamlishiwatqan shiwirghanliqi qarning yerliktiki charwichiliq we déhqanchiliqqa tayinip turmushini qamdaydighan déhqan-charwichilargha élip kélidighan iqtisadiy ziyanliri heqqidiki xewerliri intayin az bolmaqta. Yerlik da'irilerning bu heqtiki deslepki statistikiliq melumatimu 17-noyabir küni xitay merkizi hökümitige qarashliq xelq gézitidiki melumattin köchürüp bérilgendin bashqa, Uyghur diyaridiki yerlik taratqular muxbirlirining neq meydan'gha bérip qar apiti heqqide igigen melumatliri hazirgha qeder bérilmidi.

Xitayning junggo xewerler tori qatarliq hökümet taratqulirining 25-noyabirdiki xewiride, tash yol idarisida ishleydighan yol asrighuchi xadimlar we xitayning altay, chöchek rayonlirida chégrani qoghdash namida wezipe ijra qiliwatqan eskerlirining qatnash yolini rawanlashturup, tosulup qalghan yoluchilarni jiddiy qutquzghanliqi heqqidiki medhiye xewerliri köplep bérildi.

Chöchekning dörbiljin nahiyisidin ziyaritimizni qobul qilghan yerlik Uyghurlar hökümet da'irilirining shiwirghanliq qar apiti bashlan'ghandin buyan heqiqiten qatnashning rawanliqigha kapaletlik qilishni aldinqi wezipe qiliwatqanliqini, emma qatnash mesilisi aldi bilen mezkur rayonlardin toshulidighan kömür, néfit qatarliq yer asti bayliqliri we rayonda barghanche köpiyiwatqan köchmenlerning turmush éhtiyajini qamdashtiki aldinqi shert bolghini üchün, da'irilerning bu qeder köngül bölüshige seweb bolghanliqini bildürdi.

Öz kimlikini ashkarimasliqni telep qilghan bireylen bu rayonlarda ewladtin-ewladqiche yashap charwichiliq we déhqanchiliq bilen tirikchilik qiliwatqan yerlik xelqning apetke uchrash ehwali heqqide hökümet taratqulirida xewerlerning intayin azliqini bildürüp, da'irilerning rayondiki yerlik xelqning naraziliqi sewebidin yüz bérish éhtimali bolghan herqandaq bir kichikkine naraziliq herikitidinmu éhtiyat qilghini üchün, yéqinqi yillarda Uyghur diyarining muhit bulghinishi sewebidin barghanche köpiyiwatqan boran apiti, yamghur, qar apiti qatarliq tebi'iy apetlerning xelqqe keltürgen ziyini heqqidiki xewerlerning téliwizor ékranliri, radiyo we gézit-zhurnallarda barghanche aziyiwatqanliqini bildürdi.

Ötken hepte, xitayning hökümet taratqulirida Uyghur rayonida yüz bergen yamghur arilash qar apiti heqqidiki xewerler bérilgendin kéyinmu, ili diyaridin radiyomiz ziyaritini qobul qilghan Uyghurlar hökümet taratqulirida asasen qatnash tügünliridiki tosulup qalghan aptomobil we yoluchilar heqqidiki xewerler bérilip, qatnash tügünliridin yiraq bolghan yéza, qirlardiki déhqan, charwichilarning apetke uchrash ehwali heqqide xewerlerning intayin azliqini tilgha élip, bu yil qishta baldurla bashlan'ghan soghuq éqim we qar-shiwirghanliq hawa rayining, bu yil yaz peslide yamghur we kelkünning ziyinigha uchrighan ili yéziliridiki déhqanlarni yene ghemge salghanliqini bildürgen idi.

Toluq bet