Uyghur élidiki uniwérsitétlarda siyasiy layaqet sherti birinchi ölchem qilinidighanliqi jakarlandi

Muxbirimiz qutlan
2013-11-28
Élxet
Pikir
Share
Print
Uyghur aptonom rayonluq teshwiqat-terghibat ömiki shinjang uniwérsitétida uyushturghan nutuq sözlesh pa'aliyitidin bir körünüsh. 2013-Yili 27-noyabir, ürümchi.
Uyghur aptonom rayonluq teshwiqat-terghibat ömiki shinjang uniwérsitétida uyushturghan nutuq sözlesh pa'aliyitidin bir körünüsh. 2013-Yili 27-noyabir, ürümchi.
xju.edu.cn

Yéqinda Uyghur aptonom rayonidiki aliy mektep oqutquchi, oqughuchilirigha "Siyasiy jehettin layaqetlik bolush" shertining eng aliy ölchem qilinidighanliqi jakarlan'ghan.

"Shinjang géziti" ning 26-noyabirdiki sanida bu heqte mexsus xewer bésilghan bolup, Uyghur aptonom rayonidiki nuqtiliq 3 aliy mektepning 6 neper birinchi qol mes'uli ayrim-ayrim halda ipade bildürgen. Shu küni ürümchide chaqirilghan Uyghur aptonom rayonining tunji türkümdiki ma'arip emeliyiti mexsus témiliq yighinida mezkur mesile taratqulargha ashkarilan'ghan.

Merkiziy milletler uniwérsitétining dotsénti, musteqil tetqiqatchi ilham toxti shu küni "Uyghur biz" tori arqiliq pikir bayan qilip, bu "Shinjang da'irilirining nahayiti xeterlik tallishi we xata hökümi" dégen. U yene "Bügünki tor dewride da'irilerning idiye we pikir erkinlikini kontrol qilish arqiliq muqimliqni saqlaymen déyishi nahayiti külkilik ish" dep körsetken.

Melum bolushiche, 26-noyabirdiki yighinda shinjang uniwérsitétining kompartiye sékrétari ili jungyaw we mektep mudiri tashpolat tiyip, shinjang pédagogika uniwérsitétining kompartiye sékrétari lyang chaw we mektep mudiri weli barat, qeshqer pédagogika institutining kompartiye sékrétari shü ywenji we mektep mudiri erkin ömer qatarliqlar ayrim-ayrim halda ipade bildürgen.

Shinjang uniwérsitétining sékrétari ili jungyaw sözide "Aliy ma'arip sahesini milliy bölgünchilikke qarshi küreshtiki tewrenmes bazigha aylandurush zörür" likini tekitligen. U bundin kéyin "Ixtisas igilirini terbiyileshte aldi bilen siyasiy jehettin layaqetlik bolush shertini qoyidighanliqi, shinjang uniwérsitétini her bir söz we herikette milliy bölgünchilikke qarshi mustehkem istihkam" gha aylanduridighanliqi heqqide wede bergen.

Ilgiri ürümchidiki melum aliy mektepte uzun mezgil oqutquchiliq qilghan, hazir yawropada yashawatqan pezilet xanim uniwérsitétlardiki chékidin ashqan bu xil siyasiy atmosféraning emeliyette xéli burunla yiltiz tartqanliqini tekitlidi.

Qeshqer pédagogika institutining kompartiye sékrétari shü ywenjining sözi weten ichi we sirtidiki bilim ademlirini téximu endishige salghan. U sözide "Uzundin buyan, qeshqer üch xil küchlerning éghir buzghunchiliqigha uchrap kelgen, milliy bölgünchilik we diniy esebiylik yamrighan rayon bolup qaldi. Shunga qeshqer pédagogika institutini idé'ologiye saheside milliy bölgünchilikke qarshi aldinqi sepke aylandurush kérek" dégen. U sözining axirida téximu éniq ipade bildürüp, "Mektepning birinchi qol mes'uli bolush süpitim bilen siyasiy jehettin layaqetlik bolmighan oqutquchi we kadirlarni kespiy iqtidari herqanche küchlük bolsimu qet'iy östürmeymen. Siyasiy jehettin layaqetlik bolmighan oqughuchilarni hergizmu mektep püttürüshige yol qoymaymen" dep jar salghan.

Ilgiri ürümchidiki melum kespiy aliy mektepte oqutquchiliq qilghan, hazir shiwétsiyede yashawatqan Uyghur ziyaliyliridin abdushükür memet bu heqte pikir bayan qilip öz qarashlirini bildürdi.

Shinjang uniwérsitétining mudiri tashpolat tiyip, shinjang pédagogika uniwérsitétining mudiri weli barat we qeshqer pédagogika institutining mudiri erkin ömer qatarliqliqlarmu ayrim-ayrim ipade bildürüp özliri bashquruwatqan aliy mekteplerde pütün küchi bilen siyasiy ölchemni muhim tutqa qilidighanliqini bildürgen. Shuning bilen birge ular yene, aliy mektepler oqutushida merkez we aptonom rayonluq partkomning muqimliq heqqidiki siyasiy körsetmilirini hemmining aldigha qoyidighanliqi heqqide wede bergen.

Uyghur aptonom rayonidiki nuqtiliq aliy mekteplerning birinchi qol mes'ulliri teripidin hökümet taratqulirida ashkara qilin'ghan bu siyasiy boran Uyghurlar weziyitige köngül bölidighan kishilerni yenimu endishige salmaqta.

Toluq bet