Шиветсийәдики уйғурлар түрк баш консули билән көрүшти

Ихтиярий мухбиримиз еһсан
2014-07-23
Елхәт
Пикир
Share
Принт
Шветсийәдики уйғурлар түрүк баш консули билән көрүшти. 2014-Йили июл, ситокһолм.
Шветсийәдики уйғурлар түрүк баш консули билән көрүшти. 2014-Йили июл, ситокһолм.
RFA/Ehsan

Шветсийәдики уйғур тәшкилатлири мәзкур дөләттә турушлуқ түрк консули билән көрүшүп, уйғурлар түрк визиси елишта йолуқуватқан қийинчилиқлар вә нөвәттики уйғур вәзийитини аңлатқан.

Шветсийәдә яшаватқан уйғурларниң билдүрүшичә, уйғур маарип уюшмисиниң тиришчанлиқида шветсийә вәтәндиши болмиған уйғурларниң түркийәгә виза елиш ишлири илгирикидин көп асанлашқан.

Шветсийәдә паалийәт қиливатқан уйғур маарип уюшмисиниң муавин рәиси әхмәтҗан турсун башчилиқида икки кишилик һәйәт 23-июл күни чүштин кейин шветсийә пайтәхти ситокһолмда турушлуқ түркийәниң баш консули билән көрүшүштә болди.

Баш консул тайлан токмак, уйғур маарип уюшмисидики һәйәтләрни наһайити қизғин күтүвалди вә қизғин сөһбәттә болди.

Баш консул 2013-йили авғустта йеңидин баш консуллуққа тәйинләнгән. Бу қетимлиқ көрүшүш асаслиқи баш консул билән тонушуш, һәмдә шиветсийәдә яшаватқан саяһәт паспортидики уйғурларниң түркийәгә виза елиш ишлириға йеқиндин ярдәмдә болуватқанлиқиға рәһмәт ейтиш болуп, сөһбәт җәрянида уйғур маарип уюшмисиниң муавин рәиси әхмәтҗан турсун уйғур маарип уюшминиң қурулғандин буян қилип келиватқан хизмәтлирини тәпсилий аңлатти.

Шветсийәдә яшаватқан уйғурлар саяһәт паспорти билән түркийәгә бериш үчүн, түркийә әлчиханисидин виза алдиған болғачқа виза елиш ишлири бир аз мурәккәп болуп, уйғурларниң түркийәгә туғқан йоқлаш вә саяһәткә бериш ишлирида нурғун қийинчилиқларға йолуққан иди.

Бу қийинчилиқларни һәл қилиш үчүн уйғур маарип уюшмисидики һәйәтләр көп қетим түркийә консулханисидики мунасивәтлик мәсуллар билән көрүшүш арқилиқ бу мәсилини пәқәт уйғур маарип уюшмисиниң гуваһлиқида виза тәләп қилған уйғурларға түркийә консулханиси шәрт қоймастин виза беридиған болған иди.

Көрүшүштә виза бөлүм мәсуллиридин ямғур өздәмир вә әрсан бәйларму болуп, уларму бундин кейинки виза ишлирида уйғурларға йеқиндин ярдәмдә болуп, барлиқ имканлири билән уйғурларниң түркийәгә бериш ишлирини техиму асанлаштуридиғанлиқиға вәдә бәрди.

Биз бу тоғрисида тәпсилий мәлумат елиш үчүн уйғур маарип уюшмисиниң муавин рәиси әхмәтҗан турсунни зиярәт қилдуқ. Әхмәтҗан турсун бүгүнки көрүшүш мәқситини вә көрүштә қолға кәлгән нәтиҗиләрни мундақ баян қилди.

Түркийәгә виза елиш ишлирида қийинчилиқ тартқан бир яш һазирқи виза елиш ишлиридики қулайлиқларни селиштурди.

Ахирда уйғур маарип уюшмисиниң муавин рәиси әхмәтҗан турсун шветсийәдики уйғурлар түркийәгә виза елиш ишлирида диққәт қилишқа тегишлик ишлар тоғрисида тохталди.

Әхмәтҗан турсун уйғур маарип уюшмисиға вакалитән баш консул вә виза бөлүм мәсуллириға уйғурларниң чимән допписи, шәрқий түркистанниң байриқи чүшүрүлгән шарпа вә изнак совға қилди.

Пикирләр (0)
Share
Толуқ бәт